Ba wamatörö Gizaraʼeli si fulu mado, ato razo si lö sökhi. So samösa wondrege zi lö sökhi yaʼia daʼö Ahabi. Mangowalu ia khö Gizebela, ira alawe si lö sökhi sanömba Baʼali. Labunu zamaʼeleʼö khö Yehowa ba ladönisi niha ba soi daʼö ba wanömba Baʼali. Hadia nifalua Yehowa? Ifatenge Gelia samaʼeleʼö ba wamaʼema oroisa khö Gahabi.

Ifatunö Elia khö Razo Gahabi wa lö alua deu ba Gizaraʼeli börö gamuatania si lö sökhi. Töra tölu fakhe waʼara, lö tumbu zinanö ba göna lofo ndraono Gizaraʼeli. Ifuli zui ifatenge Gelia Yehowa ba wamalukhaisi Ahabi. Imane razo, ’Börö ndraʼugö daʼa!’ Imane Elia, ’Tenga börö ndraʼo wa alua mbaŵa lökhö, hizaʼi börö me ösömba Mbaʼali. Datafaigi haniha zindruhu. Fatenge fefu niha awö zamaʼeleʼö khö Mbaʼali enaʼö owulo ira ba zuzu Hili Garemeli.’

Lö ara, owulo niha ba hili andrö. Imane Elia, ’Mihalö gangetula. Na Yehowa andrö Lowalangi sindruhu, miʼoʼö ia. Hizaʼi, na Baʼali zindruhu, miʼoʼö ia. Iadaʼa, omasido utandraigö zamaʼeleʼö khö Mbaʼali si 450 enaʼö labeʼe zumange ba lakaoni lowalangira. Simanö göi ndraʼo, ubeʼe zumange ba ukaoni Yehowa. Na itema zumange andrö Lowalangi faoma alitö, daʼö Lowalangi sindruhu.’ Fao dödö niha sato.

Lafazökhi zumange ira samaʼeleʼö khö Mbaʼali. Lakaoni-kaoni lowalangira maʼö-maʼökhö waʼara, ’He Baʼali, tema wehedema!’ Börö me lö itema lira Baʼali, iʼoʼaya ira Elia. Imane, ’Miʼebuaʼö limi wogaoni yaʼia. Te no mörö ia.’ Lö laböhöli wogaoni Baʼali ofeta bongi. Hizaʼi lö idema-dema.

Ibeʼe yawa zumange khönia Elia aefa daʼö ihawui idanö. Mangandrö ia, ’He Yehowa, enaʼö aboto ba dödö ndra niha daʼa wa yaʼugö Lowalangi sindruhu.’ Iʼanemaiʼö atoru galitö moroi si yawa ba mbanua ba akhozi fefu zumange andrö. Muʼao niha sato, ’Yehowa Lowalangi sindruhu!’ Imane Elia, ’Miraʼu fefu zamaʼeleʼö  khö Mbaʼali!’ Ba zi maʼökhö daʼö, 450 niha zamaʼeleʼö khö Mbaʼali nibunu.

Me so lawuo side-ide yawa ba dete nasi, imane Elia khö Gahabi, ’Lö ara tö alua nangi. Ofanö, törö guretamö ba angawuli.’ Itugu ogömi lawuo ba dalu mbanua, tohare nangi, ba alua deu sabölö-bölö. Aetu mbaŵa lökhö. Alio sibai Gahabi ba wolohe kuretania. Börö wanolo Yehowa, abölö alio nasa fagohi Gelia moroi ba gureta daʼö! Hadia lö saʼae abula dödö Gelia? Dataʼalui.