Obugabe bw’enganda ikumi za Israeli bukaba bwine abagabe baingi babi, kwonka Ahabu akaba ari mubi munonga. Akashwera omukazi owaabaire naaramya Baali. Omukazi ogwo akaba naayetwa Yezebeeli. Ahabu na Yezebeeli bakareetera eihanga ryona kuramya Baali kandi bakaita baanabi ba Yehova. Yehova akakora ki? Akatuma nabi Eliya kutwarira Ahabu obutumwa.

Eliya akagambira Omugabe Ahabu ngu ahabw’okukora ebibi bingi, tiharikwija kugwa enjura omuri Israeli. Okumara emyaka erengire eshatu, tibarahingire misiri kandi abantu bakagira enjara. Bwanyima Yehova akagaruka yaayohereza Eliya owa Ahabu. Omugabe akagira ati: ‘Niiwe oreetsire oburemeezi obu. Ebi byona niiwe obireetsireho.’ Eliya akamugarukamu ati: ‘Tiinye ndeetsire ekyanda. Niiwe okireetsire ahabw’okuramya Baali. Nitwija kureeba ekiraabeho. Teeranira hamwe abantu na baanabi ba Baali aha Rushozi Karumeeli.’

Abantu bakeerundanira aha rushozi. Eliya akabagira ati: ‘Mwetebeekanise. Yehova ku araabe ari Ruhanga ow’amazima, mumukurate. Ku araabe ari Baali mube niwe mwakuratira. Baanabi ba Baali 450 baine kutebeekanisa ekitambo kandi bakashaba ruhanga waabo, kandi naanye niinyija kutebeekanisa ekitambo nshabe Yehova. Oraagarukemu arikukoresa omuriro, biri ogwo niwe Ruhanga ow’amazima.’ Abantu bakaikiriza.

Baanabi ba Baali bakatebeekanisa ekitambo. Izooba ryona bakashaba ruhanga waabo bati: ‘Ai Baali, otuhurire.’ Kwonka Baali tarabagarukiremu, Eliya akabateerera enaku naagira ati: ‘Nimwete munonga; agwejegyeire, ashemereire kusisiimurwa.’ Omwabazyo gukahika, baanabi ba Baali bakirikushaba. Kwonka tibaatunga ky’okugarukamu.

Eliya akata ekitambo kye aha itambiro kandi yaashukaho amaizi. Bwanyima akashaba ati: ‘Ai Yehova, reka abantu aba bamanye ngu niiwe Ruhanga ow’amazima.’ Ahonaaho, omuriro gwa Yehova gukotsya ekitambo. Abantu bakateera orwari bati: ‘Yehova ni Ruhanga ow’amazima.’ Eliya akabagira  ati: ‘Mukwate baanabi ba Baali hatagira n’omwe owaagyenda.’ Izooba eryo, baanabi ba Baali 450 bakaitwa.

Ekicu kikye ku kyareebekire ahaiguru y’enyanja, Eliya akagambira Ahabu ati: ‘Enjura neeza kugwa. Vuga ekigaari kyawe oze omuka.’ Eiguru rikagira ebicu bingi, omuyaga gwahuuha, kandi enjura nyingi ekatandika kugwa. Ekyanda kikahwa. Ahabu akavuga ekigaari kye ahonaaho yaagyenda. Eliya arikuhwerwa Yehova, akairuka yaatsiga ekigaari. Mbwenu shi oburemeezi bwa Eliya bwona bukahwa? Ka tureebe.