ƐZUKOALƐDEƐ 46
Kamɛle Boka Ne Azo Sɔnea Bie
Mbusua bulu belemgbunlililɛ ne nyianle arelemgbunli ɛtane dɔɔnwo, noko Ehabe tɛla bɛ muala. Ɔgyale raalɛ atisesebɛ bie mɔɔ sonle Beeyale la. Bɛfɛlɛ ye Gyɛzɛbɛle. Ehabe nee Gyɛzɛbɛle maanle menli dɔɔnwo zonlenle Beeyale na bɛhunle Gyihova ngapezoma ne mɔ. Duzu a Gyihova yɛle a? Ɔzoanle ngapezonli Yilaegya ɔmaanle ɔhɔhanle nrɛlaleɛ bie ɔhilele Ehabe.
Yilaegya zele Ehabe kɛ, ɔlua ye ninyɛndane ne mɔ ati, ezule ɛnrɛdɔ Yizilayɛ. Menli ne annyia aleɛ too ɛvolɛ mɔɔ bo nsa, yemɔti ɛhɔne hunle bɛ. Nzinlii Gyihova zoanle Yilaegya wɔ Ehabe ɛkɛ. Belemgbunli ne zele Yilaegya kɛ: ‘Ɛle gyegyeravolɛ! Ɛhye mɔ amuala vi wɔ.’ Yilaegya buale kɛ: ‘Tɛ medame ɔ. Beeyale mɔɔ ɛsonle ye la ati a ezule ɛndɔ a. Yɛbayɛ sɔnea bie. Boɔboa menli ne nee Beeyale ngapezoma ne anloa wɔ Kamɛle Boka ne azo.’
Menli ne rayiale boka ne azo. Yilaegya hanle kɛ: ‘Bɛnlea, saa Gyihova a le nɔhalɛ Nyamenle ne a, bɛdoa ye. Na saa Beeyale noko a, bɛdoa ye. Bɛmaa yɛyɛ sɔnea bie. Beeyale ngapezoma 450 ne ɛbɔ afɔle ɛmaa bɛ awozonle ne mɔ na medame noko mebabɔ afɔle meamaa Gyihova. Nuhua ne mɔɔ bava senle arayela ye afɔlebɔdeɛ ne la a le nɔhalɛ Nyamenle ne a.’ Menli ne liele dole nu.
Beeyale ngapezoma ne zieziele bɛ afɔlebɔdeɛ ne. Bɛvɛlɛle bɛ nyamenle ne alehyenlɛ ne amuala kɛ: ‘O Beeyale tie yɛ!’ Noko Beeyale ampili bɛ. Akee Yilaegya bɔle ɔ bo kɛ ɔgolo bɛ nwo. Ɔhanle kɛ: ‘Bɛdea nuhua kpalɛ. Bie a ɛnee yelafe na ɔwɔ kɛ bɛtunwue ye.’ Maanle nu muanle noko ɛnee Beeyale ngapezoma ne tɛfɛlɛ ye. Noko bɛande ɛhwee.
Yilaegya zieziele ye afɔlebɔdeɛ ne wɔ afɔlemokyea bie azo na ɔzale nzule ɔguale zo. Akee ɔzɛlɛle Gyihova kɛ: ‘O Gyihova, mesɛlɛ wɔ maa menli ne ɛnwu kɛ wɔmɔ a ɛle nɔhalɛ Nyamenle ne a.’ Ɛkɛ ne ala Gyihova maanle senle vi anwuma rayelale afɔlebɔdeɛ ne amuala. Menli ne deanle nuhua kɛ: ‘Gyihova a le nɔhalɛ Nyamenle ne a!’ Yilaegya hanle kɛ: ‘Bɛhye Beeyale ngapezoma ne mɔ amuala!’ Kenle ko zɔhane, bɛhunle Beeyale ngapezoma 450 ne.
Mɔɔ amungu ekyi bie vindele nyevile nu lɔ la, Yilaegya zele Ehabe kɛ: ‘Anwoma ɛlɛba aradu. Fo wɔ konle ehwili ne na kɔ sua nu.’ Maanle nu munlanle, anwoma dule na ezule kpole bie dɔle. Ehabe hanle ye ehwili ne ndɛndɛ kɛ mɔɔ ɔbahola la. Gyihova sunsum ne boale Yilaegya maanle ɔnriandile ɔzenle ehwili ne anwo! Noko asoo ɛnee Yilaegya ngyegyelɛ ne ɛra awieleɛ ɔ? Maa yɛnlea.
“Maa bɛnwu kɛ ɛdawɔ ɛ ngomekye, mɔɔ wɔ duma a le Gyihova la a ɛle Anwuma Anwumanli wɔ azɛlɛ ye amuala azo a.”—Edwɛnedolɛ 83:18, NW
Bie A Eza Ɛ Nye Balie
SUKOA BƐ DIEDI
Yilaegya—Ɔgyinlanle Nɔhalɛ Ɛzonlenlɛ Nzi
Kɛ ɔkɛyɛ na yɛazukoa Yilaegya wɔ mekɛ mɔɔ yɛ nee menli mɔɔ ɛnlie mɔɔ Baebolo ne kilehile ɛnli la ɛlɛdi adwelie la ɛ?
BAEBOLO NE MƆƆ BƐGENGA YE KƐ DRAMA
Gyihova A Le Nɔhalɛ Nyamenle Ne A
Duzu ati a nrɛlɛbɛ ɛnle nu kɛ yɛbagyakyi Gyihova na yɛazonle debie anzɛɛ awie gyɛne ɛ?
