Daut Kjennichrikj Israel met de tieen Stam haud väl schlajchte Kjennichs. Ahab wia eena von de oajchste. Dee befried sikj met de schlajchte Fru Isebel, waut Baal aunbäden deed. Ahab un Isebel brochten daut bat doa, daut en daut gaunze Launt Baal aunjebät wort, un muaken Jehova siene Profeeten doot. Waut deed Jehova doamet? Hee schekjt dän Profeet Elia met eene Norecht no Ahab.

Elia säd to dän Kjennich Ahab, daut et en Israel nich mea räajnen wudd, wäajen hee soo schlajcht wia. Äwa dree Joa jeef daut kjeene Arnt un de Menschen musten hungren. Lota schekjt Jehova Elia wada no Ahab. De Kjennich säd: “Du moakst bloos Trubbel! Daut es aules diene Schult.” Elia säd dan: “Daut es nich wäajen mie, daut et soo drieech es. Daut es, wiels jie Baal aunbäden. Moak wie mol een Proowstekj. Hol daut Volkj un de Baalsprofeeten opp dän Karmel-Boajch toop.”

Daut Volkj vesaumeld sikj doa oppem Boajch. Elia säd: “Woat junt mol to waut eenich. Wan Jehova de woara Gott es, dan deent dän. Wan daut Baal es, dan deent dän. Well wie mol utfinjen. De 450 Baalsprofeeten sellen een Opfa reedmoaken un to äaren Gott bäden. Ekj woa uk eent reedmoaken un to Jehova bäden. Deejanja, waut Fia schekjt, es de woara Gott.” Daut Volkj wia doamet envestonen.

De Baalsprofeeten muaken een Opfa reed. Dän Dach äwa schrieejen dee to äaren Gott: “Baal, auntwuat ons!” Aus Baal kjeene Auntwuat jeef, haud Elia sikj verekjt äwa dän. Hee säd: “Doot aules schrieen, waut jie kjennen! Veleicht schlapt dee, daut dän wäa mott oppwakjen.” Daut wia aul jäajen Owent, un de Baalsprofeeten schrieejen noch emma. Oba doa kjeem kjeene Auntwuat.

Elia deed sien Opfa opp eenen Aultoa nopp un begoot daut gaunz met Wota. Dan bäd hee: “Jehova, lot daut Volkj toom Jefaulen seenen, daut du de woara Gott best.” Jehova schekjt fuaz Fia vom Himmel un vebrend daut Opfa. Daut Volkj schrieech: “Jehova es de woara Gott!” Elia säd: “Lot de Baalsprofeeten nich utkleiwen!”  De 450 Baalsprofeeten worden dän Dach aula dootjemoakt.

Aus doa eene kjliene Wolkj oppem Mäa oppkjeem, säd Elia to Ahab: “Doa kjemt een Storm opp. Spaun dienen Woagen aun un foa no Hus.” Daut wort dikj dunkel, de Wint pust un daut funk aun sea to räajnen. Nu wia de drieeje Tiet äwa. Ahab fua met sienen Woagen aules, waut dee kunn. Oba Elia rand noch bosja, wiels Jehova holp dän. Wia Elia nu aule Trubbels äwa? Well wie mol seenen.