Chunka aylluspa reyesnenqa may sajras karqanku, rey Achabtaj aswan sajra karqa. Achabqa Jezabelwan casarakorqa. Chay warmitaj Baal diosta yupaychaj, sajrataj karqa. Paykunaqa ashkha israelitasta Baalta yupaychanankupaj tanqarqanku. Jehová Diospa ashkha profetasnintapis wañucherqanku. Chayrayku Diosqa profeta Eliasta Achabman kacharqa.

Eliasqa Achabman nerqa: “Sajra kasqaykirayku Israelpi mana paranqachu”, nispa. Arí, Israelpeqa kinsa wata kurajta yarqhay karqa. Chantá Jehová Diosqa Eliasta Achabman kachallarqataj. Achabtaj Eliasta nerqa: “Qan kasu mana paramunchu”, nispa. Eliastaj nerqa: “Mana jinachu. Baalta yupaychasqaykirayku mana paramunchu. Chayrayku israelitasta, Baalpa profetasnintawan Carmelo orqopi tantaykuy. Yachasuntaj pichus Dios kasqanta”, nispa.

Israelitasqa Carmelo orqopi tantakorqanku, Eliastaj nerqa: “Amaña iskayrayaychejchu. Jehová Diospuni Dios kajtenqa, payta qhatiychej. Baal dios kajtinrí, qhepanta riychej. Chayta yachanapaj, Baalpa 450 profetasnin uj jaywanata wakichispa Baalman qhaparikuchunku. Noqapis uj jaywanata wakichispa Jehovaman qhaparikusaj. Pichus ninata apachimojmin Dios kanqa”, nispa. Israelitastaj “ya” nerqanku.

Baalpa profetasnenqa jaywanasninkuta wakicherqanku. Diantintataj qhaparikorqanku: “Baal, uyariwayku”, nispa. Eliastaj asikuspa nerqa: “Aswan jatunmanta qhapariychej, ichapis payqa puñushan, rijchʼarichiychej ari”, nispa. Chʼisiyaykushajtinñataj, Baalpa profetasnenqa qhaparishallarqankupuni, nitaj imapis karqachu.

Eliasqa altarman jaywananta churaspa yakuwan jichʼaykorqa. Chantá orakorqa: “Jehová Diosníy, kay runas yachachunku qanlla Dios kasqaykita”, nispa. Jehová Diostaj ninata apachimorqa jaywananta qʼolarparinanpaj. Runastaj nerqanku: “Jehovallamin Diosqa”, nispa. Eliastaj nerqa: “Baalpa profetasninta  japʼiychej”, nispa. Chay diaqa Baalpa 450 profetasnin wañorqanku.

Chantá jatun qocha patapi uj juchʼuy phuyu rikhurerqa. Eliastaj Achabman nerqa: “Loco para jamushan, carretaykipi ripuy”, nispa. Chantá phuyu yanayaykorqa, wayrawan imataj paraqa mayta jichʼakamorqa. Achabtaj carretanpi usqhayllata riporqa. Jehová Diostaj Eliasman kallpata qorqa, Achabpa carretanmanta aswan usqhayta correnanpaj. Qhepan capitulopitaj Eliasmanta yachakullasunpuni.