Pa ri ajawbʼal re 10 tribus re Israel xekʼojiʼ kʼi itzel taq ajawinelabʼ, are kʼu ri Acab are jun chke ri más e itzel. Xkʼuliʼ rukʼ jun itzelalaj ixoq che kuqʼijilaj ri dios Baal. Ri ubʼiʼ are Jezabel. Acab xuqujeʼ Jezabel xkibʼan che kʼi winaq xkiqʼijilaj ri Baal. Xuqujeʼ xkikamisaj ri e ajqʼaxal utzij ri Jehová. ¿Jas xubʼan ri Jehová? Xutaq bʼi ri ajqʼaxal tzij Elías rech kuya jupaj tzij che ri Acab.

Elias xubʼij che ri Acab che kubʼan ta jabʼ pa ri tinamit Israel rumal che are jun itzelalaj ajawinel. Más che oxibʼ junabʼ, kʼo ta xkʼiy pa ri Ulew, xuqujeʼ ri winaq sibʼalaj kenumik. Tekʼuriʼ, Jehová xutaq bʼi ri Elías rech ktzijon chi jumul rukʼ ri Acab. Ri ajawinel Acab xubʼij che ri Elías: «Xaq xiw ri kʼax kaya at. Ronojel ri jastaq riʼ umak awech», Elías xutzalij ubʼixik che: «Kʼo ta numak rech kubʼan ta jabʼ». Kʼo ta jabʼ rumal che kaqʼijilaj ri Baal. Chamulij ri tinamit xuqujeʼ ri e qʼaxal taq tzij re ri Baal pa uwiʼ ri juyubʼ re Carmelo. Kqil kʼu na ri kkʼulmatajik.

Ri tinamit xkimulij kibʼ pa uwiʼ ri juyubʼ, tekʼuriʼ ri Elías xubʼij chke: «Rajawaxik kichaʼ kimik. We ri Jehová are ri qastzij Dios, chiterenej. Are kʼu we are ri Baal ri qastzij dios, chiterenej areʼ. Kqabʼan jun jastaq che kuqʼalajisaj: ri e 450 ajqʼaxal tzij re ri Baal rajawaxik kkisukʼumaj jun sipanik xuqujeʼ kkichʼabʼej ri kidios. Xuqujeʼ ri in kinsukʼumaj na jun sipanik xuqujeʼ kinchʼabʼej ri Jehová. Ri Dios che kutaq lo qʼaqʼ are riʼ ri qastzij Dios». Utz xuta ri tinamit.

Tekʼuriʼ, ri e qʼaxal tzij re ri Baal xkisukʼumaj ri kisipanik. Jun qʼij xkichʼabʼej ri kidios: «¡Oh Baal chata ri kqabʼij chawe!». Are kʼu ri Baal kʼo ta xubʼano, Elías xutzeʼj kiwach xubʼij: «Chichʼabʼej rukʼ ronojel ichuqʼabʼ. Weneʼ tajin kwarik xuqujeʼ rajawaxik che kʼo jun kbʼe che ukʼasuxik». Tajin kok ri aqʼabʼ, xuqujeʼ ri e qʼaxal taq tzij re ri Baal xkiya ta kan usikʼixik, are kʼu kʼo ta nijun xtatabʼen ri kitzij.

Elías xuya ri usipanik pa uwiʼ ri altar xuqujeʼ xuya kʼi joron pa uwiʼ. Tekʼuriʼ xubʼan uchʼawem: «Oh Jehová, ri tinamit kkil kʼu na che xaq xiw ri at ri qastzij Dios». Ubʼim chi wa ri tzij riʼ, Jehová xutaq lo qʼaqʼ pa ri kaj che kukʼat ri tabʼal toqʼobʼ. Ri winaq xkiraq kichiʼ: «¡Jehová are ri qastzij Dios!».  Are kʼu ri Elias xubʼij: «Kiya ta bʼe che keʼel bʼi nijun chke ri ajqʼaxal tzij re ri Baal». Pa wajun qʼij riʼ xekamisax 450 ajqʼaxal tzij re ri Baal.

Tekʼuriʼ jubʼiqʼ sutzʼ xqʼalajin pa uwiʼ ri plo, xuqujeʼ ri Elías xubʼij che ri Acab: «Petinaq jun nimalaj jabʼ. Chasukʼumaj ri chʼichʼ xuqujeʼ katbʼe pa awachoch». Ri kaj xnoj che qʼeqalalaj sutzʼ, xumaj ri kaqiqʼ xuqujeʼ jun nimalaj jabʼ. Kʼateʼ riʼ xkʼis ri e qʼij che kʼo ta jabʼ. Acab xbʼe pa ri uchʼichʼ sibʼalaj chanim xbʼek. Jehová xutoʼ ri Elías rech kutij más anim chuwach ri uchʼichʼ ri Acab. Are kʼu ¿la xekʼis ronojel ri ukʼaxkʼolil ri Elías? Chqilampeʼ.