46 KAQ WILLAKÏ
Carmëlu jirkachömi pruëbata rurayarqan
Israelchö chunka kastakunataqa mana alli reykunam gobernayarqan, peru Acabqa mas mana allim karqan. Baal nishqan diosta adoraq y alläpa mana väleq Jezabelwanmi casakurqan. Ishkampa culpanrëkurmi mëtsika israelïtakuna Baalta adorayarqan. Y Jehoväpa willakoqninkunatam mëtsikaqta wanutsiyarqan. ¿Y imatataq Jehoväqa rurarqan? Willakoqnin Elïastam Acabta parlapänampaq kacharqan.
Elïasqa kënömi Acabta nirqan: “Alläpa mana alli rey kaptikim Israel nacionchö tamya kanqatsu”. Kima watapitapis masmi chakrakunachö imapis karqantsu, y alläpa mallaqëmi karqan. Tsëpitam Jehoväqa Acabman Elïasta yapë kacharqan. Peru Acabqa kënömi nirqan: “Qamqa problëmallatam apamunki. Qampa culpëkim imëka mana allikuna pasëkan”. Elïasnam kënö nirqan: “Mana tamyamunqanqa manam noqapa culpätsu. Kë usyaqa Baalta adoranqëkirëkurmi. Llapan israelïtakunata y Baalpa sacerdötinkunata Carmëlu jirkaman qayatsimï. Tsëchömi juk pruëbata rurashun”.
Llapanmi tsë jirkaman ëwayarqan, tsënam Elïasqa kënö nirqan: “Kananmi decidiyänëki. Jehovä rasumpa kaq Dios kaptinqa, pëta sirwiyë. Peru Baal rasumpa kaq dios kaptinqa, Baalta sirwiyë. Tsëta musyanapaq juk pruëbata rurashun: Baalpa 450 sacerdötinkuna juk ofrendata rurëkur diosninkunaman mañakuyätsun. Tsënöllam noqapis juk ofrendata rurëkur Jehoväman mañakushaq. Y rasumpa kaq Diosqa ciëlupitam ninata urätsimunqa”. Y llapanmi acuerdu kayarqan.
Tsënam Baalpa sacerdötinkunaqa ofrendata alistarir, “¡Baal, wiyëkalläyämë!” nishpa entëru junaq qayakuyarqan. Peru Baalninkunaqa manam cäsurqantsu. Tsëmi Elïasqa kënö nir burlakurqan: “Llapan kallpëkikunawan qayayë. Itsapis punukashqa karnin pipis riyatsinanta wanan”. Y tardiyanqanyaqmi Baalpa sacerdötinkunaqa qayakur kayarqan, peru manam pipis cäsurqantsu.
Elïasqa ofrendanta altarman churarkurmi atska yakuta jichapurqan. Nïkurmi kënö mañakurqan: “Jehovällä, llapankuna rikäyätsun rasumpa kaq Dios qam kanqëkita”. Y jinan höram Jehoväqa ciëlupita ninata uräratsir llapan ofrendata usharatsirqan. Tsënam nunakunaqa, “¡Jehovämi rasumpa kaq Diosqa!” niyarqan. Elïasnam kënö nirqan:
“Ama jaqiyëtsu Baalpa sacerdötinkunapita jukllëllapis escapakunanta”. Tsë junaqqa 450 sacerdötikunatam wanutsiyarqan.Tsëpitanam lamar jananchö ichikllan pukutë yuririptin, Acabta Elïas kënö nirqan: “Wamayëpaq tamyam shamïkan. Carrëtëkiman lloqarkur wayikita ëwakï”. Tsënam, yana pukutë chipyëpa juntarirqan, sinchipa vienturqan y palchachëpa tamyar qallëkurqan. Y Acabqa carrëtanwanmi jananta rurinta kutikurqan. Elïasnam, Jehoväpa yanapakïninwan carrëtapitapis mas ras ëqirqan. ¿Y tsëllachöku Elïas pasanqan problëmakuna usharirqan? Rikärishun.
“Qampa jutikiqa Jehovä kanqanta, y entëru patsachöqa qamlla llapampa janampa këkanqëkita nunakuna musyayänampaq” (Salmus 83:18).