Israel llajtapi 10 aillucunataca achca millai mandajcunami mandarca. Pero Acabmi tucuicunata yalli millai carca. Paica Baal diosta adoraj Jezabel shuti millai huarmihuanmi cazararca. Paicunaca achca israelitacunata Baalta adorachunmi ayudarcacuna. Chashnallataj Jehová Diospaj achca profetacunatami huañuchircacuna. ¿Diosca imatashi rurarca? Profeta Eliastami pai nishcata huillachun Acabpajman cacharca.

Eliasca Acabtaca can yallitaj millai mandaj cajpimi Israelpica mana tamyanga nircami. Quimsa huata yallitami ni ima grano mana pꞌucurca. Gentecunaca achca yaricaihuanmi carca. Diosca cutinmi Eliastaca Acabhuan parlachun cacharca. Acabca Eliastaca, ‘canca pꞌiñachingapajmi shamungui. Cambaj culpamantami mana tamyan’ nircami. Eliasca, ‘mana ñuca culpachu. Ashtahuanpish can Baalta adorajpimi usyarin. Cunanca tucui israelcunata, Baalpaj profetacunatapish Carmelo urcupi tandachi. Chaipimi pi Diostaj cashcata ricushun’ nircami.

Israelitacuna urcupi tandanacujpica Eliasca, ‘pita catinata agllaichij. Jehová, Diostaj cajpica paita catichij. Mana cashpaca Baal, diostaj cajpica paita catichij. Pi, Diostaj cashcata yachangapajca Baalpaj 450 profetacunami ofrendata allichishpa paicunapaj diospaj shutipi mañana can. Ñucapish shuj ofrendata allichishpa Jehovapaj shutipimi mañasha. Mañashcata uyashpa ninata cachajmi Diostaj canga’ nircami. Gentecunaca ari nircacunami.

Chaipimi Baalpaj profetacunaca ofrendata allichircacuna. Tucui punllami paicunapaj diostaca, ‘Baal ñucanchij mañashcata uyahuai’ nishpa mañarcacuna. Baal mana cutichijpimi Eliasca chanzata rurashpa, ‘ashtahuan sinchita caparichij. Mana cashpaca dormicungamari, rijchachinamari’ nirca. Casi tutayangacamami Baalpaj profetacunaca mañacurcacunalla. Pero pi mana uyarcachu.

Eliasca altar jahuapi caj ofrendapimi achca yacuta jicharca. Qꞌuipaca, ‘Jehová Dioslla israelitacunamanca canlla Dios cashcata ricuchiyari’ nishpa mañarca. Chai ratomi Diosca jahuamanta ninata cachashpa ofrendata rupachirca. Gentecunaca, ‘Jehovami Diostaj can’ nishpami caparircacuna. Eliasca gentecunataca, ‘Baalpaj profetacuna shujllapish richun ama  saquinguichij’ nircami. Chai punllapica 450 Baalpaj profetacunatami huañuchircacuna.

Qꞌuipaca mama cucha yacu jahuapimi shuj uchilla pꞌuyu ricurirca. Chaipimi Eliasca Acabtaca, ‘amaraj tamya shamujpi cambaj carrota allichishpa huasiman utca tigrai’ nirca. Yana pꞌuyu amsayashpami yallitaj tamyai callarirca. Chashnami usya punllaca tucurirca. Acabca paipaj carropimi utca rirca. Eliastaca Jehová ayudajpimi carrotapish mishashpa callpashpa rirca. Pero ¿Eliaspaj llaquicunaca chaipichu tucurirca? Ricushun.