Israel nacionpi 10 ayllukunata kamachiqkunaqa mana allin runakunam karqaku, aswanraqmi Acab sutiyuq runaqa. Payqa Baal taytachata yupaychaq mana allin Jezabel warmiwanmi casarakururqa. Paykunam runakunatapas tanqaqku Baalta yupaychanankupaq, chaymantapas Jehova Diosmanta willakuqkunatam wañurachirqaku. Chaymi Diosqa paymanta willakuq Eliasta Acabman kacharqa.

Eliasmi Acabta nirqa mana allin kamachiq kasqanrayku kimsa wata mana parananmanta. Chaymi mana parasqanrayku runakunapas yarqaymanta karqaku. Kaqmantam Diosqa Eliasta Acabman kacharqa, chaymi Acabqa nirqa: “Qampa huchaykipim mana paramunchu”, nispa. Eliasñataqmi nirqa: “Qanmi huchayuqqa kanki Baal taytachata yupaychasqaykirayku. Runakunatawan Baal yupaychaqkunatayá Carmelo sutiyuq urquman rinankupaq niy, chaypim yachasunchik pim chiqap Dios kasqanta”, nispa.

Carmelo urqupi huñunakuruptinkum Elias nirqa: “Sichum Jehova chiqap Dios kaptinqa paytayá yupaychaychik, sichu Baal chiqap dios kaptinqa paytañayá yupaychaychik. Kunanmi 450 Baalmanta willakuqkuna animalta quspa qayakunkichik, ñuqapas Jehova Diosniypaqmi animalta quspay payta qayakusaq. Chiqap Dios kaqmi ninata kacharimunqa”, nispa.

Chaymi Baalta yupaychaqkuna animalta quspanku tukuy punchaw qayakurqaku “¡Baal, uyariykuwayku!”, nispa. Baal mana uyariptinmi Eliasqa asikuspan nirqa: “Kallpawanyá qayakuychik rikchachinaykichikpaq, ichapas puñurun”, nispa. Hinalla tutaykunankama qayakuptinkupas Baalqa manam uyarirqachu.

Eliasñataqmi altarman animalta hinaykuspan achka yakuta talliykurqa, hinaspam Diosta mañakurqa: “Jehova Dioslláy lliw runakunayá yachachunku chiqap Dios kasqaykita”, nispa. Chayllam Diosqa ninata kachaykamuspan animalta ruparachirqa. Runakunañataqmi  qaparirqaku: “¡Jehova Diosmi chiqap Diosqa!”, nispa. Eliasñataqmi kamachirqa Baalmanta 450 willakuqkunata wañuchinankupaq.

Chaymantam lamar quchamanta puyucha rikuriramuptin Acabta Elias nirqa: “Waqaya paraqa hamukuchkanña, ayqikuyña wasikiman”, nispa. Hinaptinmi yana puyu rikuriramuptin wayra-wayrantin llumpayta pararamurqa. Acabqa carronpim apurawllamanña rirqa. Eliasñataqmi Jehova Diospa yanapakuyninwan carromantapas astawanraq kallparqa. Qatiqninpim astawanraq Eliasmanta yachasun.