Israel nacionpiqa yaqa llapa reykunan millay karanku, rey Ajabmi ichaqa aswan millay karan. Payqa Baal diosta adoraq Jezabel warmiwanmi casarakuran. Paykunan runakunata tanqaranku Baalta adoranankupaq. Jehová Diospa profetankunatapas wañuchirankun. ¿Imatan Dios ruwaran? Profeta Eliastan kacharan Ajabwan rimananpaq.

Eliasmi Ajabta niran: “Israelpin kinsa wata mana paramunqachu millay rey kasqaykirayku”, nispa. Jinan mana imapas wiñaranchu runakunataq yarqaymanta karanku. Chaymantan Diosqa Eliasta kacharan Ajabwan rimananpaq. Jinan Ajabqa Eliasta niran: “Juchaykipin mana para kanchu”, nispa. Eliastaq kutichiran: “Manan noqaq juchaypichu, aswanpas qanmi juchayoq kanki Baalta adorasqaykirayku. Runakunata, Baalpa profetankunatapas kamachiy Carmelo orqoman rinankupaq. Chaypin juj pruebata rikunkichis”, nispa.

Runakunaqa orqopin juñukuranku, jinan Eliasqa niran: “Sichus Jehová cheqaq Dios chayqa payta serviychis, Baal kaqtintaq chayta serviychis. Kunanmi juj pruebata rikunkichis. Baalpa 450 profetankunan ofrendata preparaspa diosninkuta wajanqaku. Noqapas ofrendata preparaspan Jehová Diosta wajasaq. Ninawan kutichimuqmi cheqaq Diosqa kanqa”, nispa. Runakunataq “allinmi” niranku.

Jinan Baalpa profetankunaqa ofrendata preparaspa p’unchaynintin wajakuranku: “¡Baal kutichimuwayku!”, nispa. Baalmi ichaqa mana kutichimuranchu, Eliastaq burlakuspa niran: “Aswan kallpawan wajakuychis, puñushanpaschá, rijch’achinatapaschá necesitan”, nispa. Intipas chinkaypusharanñan Baalpa profetankunataq wajakushallaranku, manataq pipas kutichimuranchu.

Jinan Eliasqa altar pataman ofrendata churaspa unuta jich’aran, jinaspa mañakuran: “Jehová Diosniy, lliupas yachachunku cheqaq Dios kasqaykita”, nispa. Jinan Diospa kachaymusqan ninaqa ofrendata rupharan. Chaymi runakunaqa niranku: “¡Jehová Diosmi cheqaq  Diosqa!”, nispa. Eliastaq niran: “Ama Baalpa juj profetanpas ayqechunchu”, nispa. Chay p’unchaymi 450 Baalpa profetankuna wañuranku.

Chaymantan lamar-qocha patapi rijuriran juch’uy phuyu, jinan Eliasqa Ajabta niran: “Sinchitan paramunqa, carretaykipi wasiykiman ripuy”, nispa. Jinan paramuyta qallariran. Chaywanmi ch’akiriy tiempo tukupuran. Ajabqa carretanpin phawaran. Diostaq Eliasta yanaparan carretamantapas aswan usqhayta phawananpaq. Ichaqa, ¿chaypichu Eliaspa problemankuna tukukuran? Qatimuqpi yachasun.