Israelmanda 10 familiacunaca tauca nali reycunatami charirca. Paicunapuramandaca rey Acabmi ashtahuan nali carca. Paica Baal nishca yanga diosta sirvij nali, millai Jezabelhuanmi cazararca. Shinami Acabpa, Jezabelpa chaquita catishpa ashtaca gentecuna Baal nishca diosta adoranajurca. Shinallata Jehová Diospa ashtaca profetacunatapashmi huañuchirca. Chaita ricushpaca ¿imatata Jehová Diosca rurarca? Profeta Eliastami Acabman shuj mensajeta villachun cacharca.

Eliasca Acabtaca nircami, can nali rey caimandami caipica na tamianga nishpa. Chaimi quimsa huata yalita pambacunapi imapash na viñajpi gentecunaca yarjai pasanajurca. Jipamanga Jehová Diosca cutinmi Eliasta, Acabhuan parlachun cacharca. Chaipimi rey Acabca Eliastaca cashna nirca: ‘¿Canmi israelitacunata pandachij cangui?’, canmandami tucui nalicuna pasajun nishpa. Shina nijpimi Eliasca nirca: Ñucaca na culpata charinichu. Baal dioscunatara can catijushcamandami na tamiashca. Cunanga tucui israelitacunata, Baalta catijcunatapash Carmelo urcupi tandanajuchun cachai. Chaipimi pipacha Taita Dios cashcata ricushun nishpa.

Carmelo urcupi israelitacuna tandanajujpimi Eliasca paicunataca nirca: Jehová ‘Taita Dios cajpica, paita catichi. Ashtahuangarin Baal dios Taita Dios cajpica, paita catishpa richilla. Chaita yachangapaca caita ruraichi, Baalta sirvij 450 profetacuna shuj sacrificiota rurashpa ‘cangunapa diospa shutipi mañaichi’. Shinallatami ñucapash shuj sacrificiota rurashpa Jehová ‘Diospa shutipi mañasha’. Shina ‘mañajujta uyashpa maijan Dios cashpapash ninata cachamushpaca, chaimi Taita Diospacha canga’ nishpa. ‘Shina nijpimi gentecunaca alitami nijungui ninajurca’.

Baal diosta sirvijcunaca sacrificiota rurashpami punlla entero “Baal, ñucanchi mañajujta tigrachihuayari” nishpa mañanajurca. Shina mañanajujpipash: Baal “tigrachijllapash na uyarircachu”. Chaimi ‘Eliasca paicunata asishpa, cashna nirca: Baalta shinllita caparichi paica puñujungami, rijchachinami canga’ nishpa. Ña amsayajujpipash Baalta sirvijcunaca mañanajurcarami. Shinapash nipi na tigrachircachu.

Eliasca sacrificiota altar jahuapi churashpa chaipi ashtaca yacuta churashca jipami, cashna mañajurca: Jehová Dioslla ‘Israel llactapica canlla Taita Dios cajta cunanga ricuchipayari’ nishpa. Chai jipallami Jehová Dios ‘cachamujpi nina urai shamushpa, Diosman carashcataca tucuillata rupachirca’. ‘Chaita tucuicuna ricushpami [“Jehová Diosmi”, NM], Taita Diospacha can ninajurca’. Chaimi  Eliasca nirca: ‘Baalmanda villajcunaca shujllapash ama pacajushpa richun tucuillata japichi’ nishpa. Shinami chai punllapica 450 Baalmanda villajcunata huañuchirca.

Chai jipaca ‘asha fuyu mama cuchamanda vichai jatarijta Elías ricushpami’ Acabtaca nirca: “Ama tamia japichun, caballocunapi carretata huatashpa ucha urai rilla” nishpa. Chaimi ‘huairahuan fuyu shamushpa yanayashpa ninandapacha tamiarca’. Shinami chaquishca tiempoca tucurirca. Chaimi Acabca carretapi vitsiashpa uchalla rirca. Ashtahuanbash Jehová Dios ayudajpimi Eliasca, Acabpa carretatapash mishashpa rirca. Shinapash ¿Eliasca ñanachu llaquicunata charigrijurca? Chaitaca shamuj capitulopimi yachajushun.