O kraljevstvo Izrael hine lje deš plemenija. Upro akala deš plemenija vladindže but lošna kraljija, ama o Ahav hine jekh ando najlošna. Ov ljelja pese jekha lošno romnja koja služindža e Valese. Olako nav hine Jezavelja. O Ahav hem i Jezavelja čhivdže e manušen te služinen e Valese hem mudardže buten e Jehovase prorokonen. So čerdža o Jehova sebepi odova? Ov bičhaldža e proroko, e Ilija, te phenel diso e Ahavese.

O Ilija phendža e Ahavese so ko Izrael na ka džal boršim odoljese so ov čerela lošnipe. Pobuter ando trin berš ko njive na barilo ništa hem ki phuv hine baro bokhaljipe. Palo odova, o Jehova paljem bičhaldža e Ilija ko Ahav. O kraljo phendža: „Tu čereja amendže samo problemija! Tu hijan krivo aso sa.“ O Ilija phendža: „Me na hijum krivo so na džala boršim. Tu hijan krivo sose služineja e Valese. Hajde te dikha koj tano o čačutno Devel. Čede sa e narodo hem e Valese prorokonen ki planina Karmil.“

Ked o manuša čedindže pe ki planina, o Ilija phendža ljendže: „Odlučinen so ka čeren. Ako tano o Jehova o čačutno Devel, služinen oljese. A ako tano o Val, tegani služinen oljese. Hajde te dikha odova. E Valese 450 prorokija neka spreminen piklji žrtva hem neka molinen pe peklje devljese, a me ka spreminav miklji žrtva hem ka molina man e Jehovase. O Devel kova ka odgovorini e jagaja, ov tano o čačutno Devel.“ O manuša složindže pe odoljeja.

E Valese prorokija spremindže piklji žrtva. Celo dive molindže pe peklje devljese: „O Val, šun amen!“ Ama, o Val na odgovorindža. O Ilija mardža ljese muj hem phendža: „Pištinen pobuter. Šaj sovela, pa valjani neko te vazdel lje ando sojbe.“ Počmindža te račol, a e Valese sluge pana vičindže lje. Ama, ov na odgovorindža ljendže.

O Ilija čhivdža piklji žrtva ko oltar hem čhordža pani upro late. Tegani molindža pe: „O Jehova, molinava tut, mothov ljendže so tu hijan o čačutno Devel.“ Ko odova trenutko, o Jehova mukhlja i jag ando nebo hem thardža  i žrtva. O manuša počmindže te pištinen: „O Jehova tano o čačutno Devel!“ O Ilija phendža: „Doljen e Valese prorokonen te na našen!“ Odova dive, sa e Valese 450 prorokija hine mudarde.

Ked jekh tikno oblako pojavindža pe upro more, o Ilija phendža e Ahavese: „Ka ovel nevreme. Uklji ki tiklji kočija hem dža tuče čhere.“ O nebo kaljilo, počmindža te phudel bari bavlal hem palo but vreme paljem počmindža te džal baro boršim. O Ahav vozindža i kočija but sigate. Ama, e Jehovase snagaja, o Ilija prastandilo posigate andi kočija! Da li završindže pe e Ilijase muke? Ka dikha.