Андо израильско царство, кай сас дэш племя, слинэ бут найлашэ царёря. Ек анда само найлашо царё сас о Ахаво. Во женисайля пэ Иезавель, сави фартэ холинати. Вой тэлёлас хохавнэ дэвлэсти лэ Ваалости. Через о Ахаво и через Иезавель, фартэ бут израильтяноря линэ тэ тэлён лэ Ваалости. О Ахаво и Иезавель даже умарэнас лэ Иеговастирэ пророконэн. Со стердя о Иегова? Во бишалдя кай о Ахаво лэ пророкос лэ Ильяс тэ ԥэнэн, со важ када лэнди авэла.

О Дэл на ашадя лэ Ахавости вся када кадя важ лэстири найлащи дила. Важ када о Илья ԥэндя лэ царёсти, кай андо Израилё на авэла брышын. Май бут, чем трин бэрш на сас урожаё и мануша слинэ боқалэ. Прожыля время о Иегова упалэ бишалдя лэ Ильяс каринг о Ахаво. О царё ԥэндя: «Када вся через тутэ! Ту дошало, кай амэндэ биды». О Илья ԥэндя: «Кай брышын нинай, када най мэ стердэм. О брышын нинай, важ кода кай ту тэлёс лэ Ваалости. Давай диқаса, ко чачуно Дэл. Стидэ лэ народос и лэ Ваалостирэ пророконэн по плай Кармило».

И мануша стидэпэ по плай и о Илья ԥэндя: «Погиндон и витидэн, сар о Иегова чачуно Дэл, кандэн лэс. Ай сар о Ваало, кандэн лэс. Мэк 450 лэ Ваалостирэ пророкоря анэна о мас по жертвеннико и ақарэна пэстирэ дэвлэс. Ай мэ пэсти жертва анава и ақарава лэ Иеговас. Ко бишалэла яг, кодэва и исин чачуно Дэл». И мануша ԥэндэ, кай стерэна кадя.

Лэ Ваалостирэ пророкоря стодэ о мас по жертвеннико и вся о дес ақарэнас пэстирэ дэвлэс: «Ваало, стер када!» Но нисо на сас. Тоди о Илья ля тэ приасалпэ лэ Ваалостар: «Цыпин май фартэ! Может во засутя и лэс трэбуй тэ жунгавэн». Поджыля о вэчэро, ай вонэ вся цыпинас. Но нисо кадя и на сас.

О Илья стодя пэсти жертва по жертвеннико, обшутя лэ паеса и мангляпэ: «Иегова, сыкав лэнди, кай ту чачуно Дэл». И акэ, о Иегова бишалэл па нэбо яг и жертва лэл тэ ԥабол. И мануша зацыписайлэ: «Иегова, чачуно Дэл!» О Илья зацыписайля: «На дэн, кай тэ  унашэнтар лэ Ваалостирэ пророкоря!» Андэ кадэва дес умардэ 450 хохавнэ пророконэн.

Кала понад и моря дицэля цынёни туча, о Илья ԥэндя лэ Ахавости: «Щяс авэла бари балвал брышындэса. Бэш андо вурдон и ладэ цэрэ». О нэбо покалеля. Ашэля бари балвал и жыля баро брышын. О шукимос парашэля! О Ахаво фартэ йто грабияспэ тэ ладэл. Ай о Илья, важ кода кай о Иегова дэлас лэсти зор, нашэлас май йто, чем ладэлас о вурдон! Со сас май англэ лэ Ильяса? Давай уӷанаса.