vwa Ahabi abemubi kakhulu. Washada nemfati lebekakhonta Bhali. Ligama lakhe bekunguJezebeli. Ahabi naJezebeli bakhutsata bantfu kutsi bakhonte Bhali futsi babulala baphrofethi baJehova. Yini Jehova layenta? Watfumela umphrofethi Elija kutsi amikise umlayeto ku-Ahabi.

Elija watjela Ahabi kutsi belingeke lisana ka-Israyeli ngenca yebubi lebekabentile. Kwaphela iminyaka lengu-3 solo kute lokumilako futsi bantfu balamba kakhulu. Ngekuhamba kwesikhatsi Jehova waphindze watfuma Elija ku-Ahabi. LeNkhosi yatsi: ‘Nguwe lona losiletsela inhlupheko lenkhulu kangaka.’ Elija wayiphendvula watsi: ‘Mine angikayiletsi inhlupheko kodvwa iletfwe nguwe ngekukhonta Bhali. Ngicela ubitele sonkhe lesive eNtsabeni iKhameli, nebaphrofethi.’

Labantfu bahlangana entsabeni. Elija watsi: ‘Kuyawuze kube nini nicinisa tinhloko? Nangabe Jehova anguNkulunkulu weliciniso, landzelani yena kodvwa nangabe kunguBhali, landzelani yena! Baphrofethi baBhali labangu-450 abakhetse kucala inkunzi leseyincane bayibulale bese babita ligama lankulunkulu wabo, nami ngitawubulala lena lenye inkunzi bese ngibita ligama laJehova. Nkulunkulu lotawuphendvula ngekwehlisa umlilo utawukhombisa kutsi nguye longuNkulunkulu weliciniso.’ Bantfu bavuma.

Baphrofethi baBhali balungiselela iminikelo. Kwaphela lilanga lonkhe solo bamemeta nkulunkulu wabo batsi: ‘Bhali siphendvule!’ Ngesikhatsi Bhali angaphendvuli Elija wahlekisa ngabo watsi: ‘Memetani kakhulu, mhlawumbe ulele futsi kudzingeka kube khona lomvusako.’ Ngisho selishonile baphrofethi baBhali bachubeka bammemeta. Kodvwa akazange abaphendvule.

Elija wabeka umnikelo wakhe etikwelilati wase uwutsela ngemanti. Wase uyathantaza utsi: ‘Jehova, ngicela ungiphendvule kuze labantfu bati kutsi wena unguNkulunkulu weliciniso.’ Ngekushesha Jehova wehlisa umlilo uvela ezulwini washisa lomnikelo. Bantfu bamemeta batsi: ‘Jehova unguNkulunkulu weliciniso!’ Elija watsi: ‘Bambani labaphrofethi  baBhali kungaphunyuli ngisho namunye.’ Ngalelo langa baphrofethi baBhali labangu-450 babulawa.

Ngesikhatsi kuvela lifu lelincane ngaselwandle, Elija watsi ku-Ahabi: ‘Bophela incola yakho uhambe ngobe kuta imvula lenkhulu.’ Emafu agucuka aba mnyama, kwahhusha umoya, lase licala kuna kakhulu. Ekugcineni somiso saphela. Ahabi wagibela incola yakhe wabaleka. Ngekusitwa nguJehova, Elija wagijima kakhulu wengca lencola. Manje besetiphelile yini tinkinga ta-Elija? Asesibone.