Su kararatuang Israel mapul᷊o suku, piạ lawọ datu dal᷊akị. Sěmbaụ datu sěbạe dal᷊akị ene kai i Ahab. I sie nẹ̌kawing dingangi Izebel, wawine ral᷊akị měnẹ̌němbah Baal. I sire němate manga nabing i Yehuwa kụ nakakoạ taumata su tampạ ene lai něněmbah Baal. Apa nikoạ i Yehuwa? I Sie něngoro si Nabi Elia gunang pěhabarẹ̌ tatanata si Ahab.

Elia naul᷊ị si Ahab ual᷊ingu i sie někoạ barang dal᷊akị, su Israel sarung tawe mẹ̌tahiti. Mal᷊iu bọu tělu taung, sasuang tawe tumuwo kụ tau Israel sarung kal᷊unusang. Bọu ene, Yehuwa něngoro si Elia saụ pẹ̌sombang i Ahab. Datu ene nẹ̌bera, ’Kěbị ini nariadi ual᷊ingu i kau!’ Elia simimbahẹ̌, ’Pědisẹ̌ ini nariadi bal᷊inẹ ual᷊ingu iạ, katewe ual᷊ingu i kau něněmbah Baal. Kěnang i kitẹ měmanda i sai Mawu kahěngang. Orọe taumata dingangu manga nabing Baal pẹ̌tampung su wowong Wul᷊udu Karmel.’

Bọu ene, taumata nẹ̌tampung su wul᷊udẹ̌ ene. Elia nẹ̌bera, ’I kamene harusẹ̌ měkoạ putusang. Mạeng Yehuwa Mawu kahěngang, tol᷊ẹe si Sie. Katewe mạeng Baal kahěngang, tol᷊e si sie. Su tempo ini, iạ mapulu 450 nabing Baal měkoạ sasěmbah kụ měkui mawung i sire. Iạ lai sarung měkoạ sasěmbah kụ mẹ̌kui si Yehuwa. I saing sumimbahẹ̌ dingangu putung i sie kai Mawu kahěngang.’ Taumata sene setuju.

Manga nabing Baal někoạ sasěmbah. Sahěllo tiwatu i sire nẹ̌kui si Baal, ’Baal, simbaheko i kami!’ Ual᷊ingu i Baal tawe simimbahẹ̌, i Elia nělangehẹ̌ si sire. I sie naul᷊ị, ’Pěkuịe pakaihạ-ihạ. Ěndịu i sie mětẹ̌tikị kụ harusẹ̌ pukong.’ I sire turusẹ̌ nẹ̌kui si Baal sarang hěbi, katewe Baal tawe simimbahẹ̌.

Elia nẹ̌taho sasěmbane su mezbah kụ nisěbohẹ̌ dingangu akẹ. Bọu ene i sie nẹ̌doa, ’Yehuwa, koạko taumata sini makasingkạ i Kau kai Mawu kahěngang.’ Yehuwa apidu něgělị putung bọu langị kụ něnutung sasěmbah ene sarang nasue. Taumata sene něbera dingangu tingihẹ̌ maihạ, ’Yehuwa kai Mawu kahěngang!’ Elia naul᷊ị, ’Samẹ kěbị nabing Baal!’ Su ěllo ene, 450 nabing Baal nipate.

 Su tempong piạ binawa kadodọ su wowong laudẹ̌, Elia naul᷊ị si Ahab, ’Seng mal᷊ighạ tahiti mal᷊awọ dingangu anging maihạ duměnta. Awịe su karetanu kụ kapul᷊ẹe.’ Langị sauneng narěndung, anging timiụ, kụ tahiti mal᷊awọ něngěndụ. Samurine, pědisẹ̌ něngědo. Ahab masahawu nẹ̌bawa karetane. Ual᷊ingu Yehuwa nẹ̌tul᷊ung, i Elia timal᷊ang limembong mahawesẹ̌ bọu kareta ene! Katewe, apa kěbị masalang i Elia seng nasue? Boete i kitẹ mědeạ sasimbahe.