Náa gu̱wa̱ʼ xuajen ma̱jkha̱ʼ ndrígóo reino dí rígá náa Israel nikuwa mbaʼin wéñuʼ reyes bi̱ ra̱míjínʼ, mú Acab ninindxu̱u̱ itháan ra̱májánʼ. Ninigúnʼ ga̱jma̱a̱ mbáa a̱ʼgu̱ bi̱ ndaʼyamajkuu dios Baal. Nigumbiʼyuu Jezabel. Acab ga̱jma̱a̱ Jezabel nini rí mbaʼin xa̱bu̱ mbuyamajkuíí Baal. Ma̱ngaa niradíin mbaʼin gaʼyee ndrígóo Jeobá. Ndiéjunʼ niʼni Jeobá rá. Nikunguanʼ gaʼyee Elías mu maxnúu Acab mbá ajngáa.

Elías niʼthúu̱n Acab rí xáxnúu ruʼwa náa Israel numuu rí ikhaa nindxu̱u̱ mbáa rey ra̱májánʼ wéñuʼ. Itháan rí ajtsú tsiguʼ nándáa rí nijma̱a̱ náa ku̱ba̱ʼ, ga̱jma̱a̱ xa̱bu̱ naxkidxu̱u̱n wéñuʼ. Nda̱wa̱á Jeobá nikunguanʼ Elías mbu̱júu̱ mu maʼtámíjná ga̱jma̱a̱ Acab. Ikhú rey Acab niʼthúu̱n Elías: “Ikháánʼ índo̱ natani rí marigá xkujndu. Xúgíʼ rígi̱ narígá ga̱jma̱a̱ numaaʼ”. Ikhú Elías niriʼñuu: “Raʼkháa ikhúúnʼ gúʼdoo aʼkhúnʼ rí tséxnúu ruʼwa. Nánguá exnúu ruʼwa numuu rí natayamajkuíí Baal. Atagímbíin xa̱bu̱ ga̱jma̱a̱ gaʼyee ndrígóo Baal náa inuu kúbá Carmelo. Musngajmá tsáa nindxu̱u̱ Dios gajkhun”.

Xa̱bu̱ nigimbíin náa kúbá, ikhú Elías niʼthún: “Gíʼmaa mbu̱ya̱a̱ ndiéjunʼ gúni̱. Á mu Jeobá nindxu̱u̱ Dios gajkuwiin, aʼgua̱ kidxuuʼ. Mú á mu Baal nindxu̱u̱ dios gajkhun, guʼgua̱ kidxuuʼ ikhaa. Mbuʼyáá: Bi̱ 450 gaʼyee ndrígio̱o̱ Baal gíʼmaa muniratáá mbá altar ga̱jma̱a̱ mundxa̱ʼwa̱a̱ dios ndrígála. Mangúún maniratoo mbá tsigijñaʼ ga̱jma̱a̱ mathu̱u̱n Jeobá. Dios bi̱ gáriʼña makuʼmaa aguʼ, ikhaa buʼko̱ nindxu̱u̱ Dios gajkhun”. Xa̱bu̱ nindúún rí xúʼko̱ gáʼni.

Ikhú, gaʼyee ndrígóo Baal, nini májánʼ tsigijñaʼ ndrígu̱ún. Nitháán dios ndrígu̱ún kañiʼ mbiʼi: “¡Oh, Baal, atriʼñuxu!”. Mú numuu rí Baal tariʼña̱a̱, Elías nitsíjma índo̱ niʼthí: “Gundxaʼwa̱a̱ ga̱jma̱a̱ xúgíʼ tsiakii ndrígála. Mbáa niʼgu ga̱jma̱a̱ ndayóoʼ tsáa maxkajui̱i̱”. Ni̱jkha̱ rakína, ga̱jma̱a̱ gaʼyee ndrígio̱o̱ Baal xóó nutháán ga̱jma̱a̱ nimbáa táriʼña.

Elías nitsrigu tsigijñaʼ náa altar ga̱jma̱a̱ nixidirámuʼ mba̱ji̱nʼ iyaʼ tsu̱du̱u̱. Nda̱wa̱á niʼthá kháñuu: “Oh, Jeobá, xa̱bu̱ guyáá rí ikháánʼ ni̱ndxa̱ʼ Dios gajkhun”. Núkhu, Jeobá nikuʼma aguʼ asndu mekhuíí mu matsikhá tsigijñaʼ. Ikhú  xa̱bu̱ nindxa̱ʼwa̱: “¡Jeobá nindxu̱u̱ Dios gajkhun!”. Elías niʼthí: “Xúniʼñáʼ rí nimbáa gaʼyee ndrígóo Baal makríyaʼ”. Mbiʼi rúʼko̱ niradíin mbá 450 gaʼyee ndrígóo Baal.

Nda̱wa̱á nikujmaa mbá chíʼgíʼ du̱u̱n náa lamáa, ga̱jma̱a̱ Elías niʼthúu̱n Acab: “Na̱ʼkha̱ mbá ruʼwa mbiiʼ. Ataniratáá carro ndrígáʼ ga̱jma̱a̱ ayuʼ guʼwáaʼ”. Mekhuíí nigúgoo ga̱jma̱a̱ du̱u̱n skuniʼ, ga̱jma̱a̱ nigíʼdu̱u̱ nixnúu giñánʼ ga̱jma̱a̱ nigíʼdu̱u̱ nixnúu ruʼwa gakhi̱i̱. Acab niguta̱nga̱a̱ ga̱jma̱a̱ carro itháan nacha̱ xó má niʼngo̱o̱. Jeobá nimbáyúu Elías mu magayúu itháan nacha̱ ki xóo carro. Mú, lá niguámbá xúgíʼ xkujndu rí nigiʼdoo Elías ráʼ. Guʼyáá.