Mafumu nganandi ngo ngangulamuliya Ufumu wa Yisraele wa mafuku 10 ngenga ngaheni kweni Ahabu yenga fumu yiheni ukongwa. Iyu wanguto munthukazi muheni yo wasopanga Bala. Zina laki wenga Yezebelu. Ahabu ndi Yezebelu anguchitisa kuti ŵanthu anandi asopengi Bala ndipu angubaya achimi aku Yehova. Kumbi Yehova wanguchitanjipu? Iyu wangutuma mchimi Eliya kuti wakakambi uthenga kwaku Ahabu.

Eliya wangukambiya Fumu Ahabu kuti chifukwa cha vinthu viheni vo wachitanga, muwengi vuwa cha mu Yisraele. Vuwa yinguwa cha kwa vyaka vakujumpha vitatu, mbewu zingume cha ndipu ŵanthu ŵengavi chakurya. Pati pajumpha nyengu, Yehova wangutuma Eliya kuti waluti so kwaku Ahabu. Fumu yo yinguti: ‘Ndiwi wakusuzga ukongwa! Iwi ndiwi wachitisa kuti kuŵi nja.’ Eliya wangumuka kuti: ‘Ndini cha ndachitisa kuti kuje nja. Imwi ndimwi mwachitisa chifukwa chakusopa Bala. Tiyeni tiwoni yo ndi Chiuta wauneneska. Wunganisani Ayisraele ndipuso achimi aku Bala pachanya Paphiri la Karmele.’

Ŵanthu anguwungana paphiri. Eliya wanguti: ‘Sankhani. Asani Yehova ndi Chiuta wauneneska mulondoni. Asani ndi Bala londoni iyu. Tiyeni tiwoni yo ndi Chiuta wauneneska. Achimi 450 aku Bala anozgi sembi ndipu apempheri kwaku chiuta wawu ndipu nani ndinozgengi sembi yangu, ndipempherengi kwaku Yehova. Chiuta yo wamukengi mwakutumiza motu ndiyu Chiuta wauneneska.’ Ŵanthu wosi anguzomereza.

Achimi aku Bala angunozga sembi yawu. Yiwu angupemphera zuŵa losi kwaku chiuta wawu kuti: ‘Bala, timuki!’ Bala wati watondeka kumuka, Eliya wangwamba kuseka Bala. Iyu wanguti: ‘Danirizani ukongwa. Panyaki wagona, pakhumbika munthu kuti wamuyuski.’ Kwati kwafipa, achimi aku Bala angulutiriza kupemphera. Kweni Bala wanguŵamuka mbwenu cha.

Eliya wanguŵika sembi yaki paguŵa ndipu wangudilapu maji. Pavuli paki wangupemphera kuti: ‘Yehova, chondi aziŵiseni ŵanthu kuti imwi ndimwi Chiuta wauneneska.’ Wati wamaliza ŵaka kupemphera, Yehova wangutuma motu kutuwa kuchanya ndipu ungupiliza sembi yo. Ŵanthu angudaniriza kuti: ‘Yehova ndiyu Chiuta wauneneska!’ Eliya  wanguti: ‘Mungazomerezanga cha kuti achimi aku Bala athaŵi!’ Pa zuŵa lenili, achimi 450 aku Bala angubayika.

Kusirya linyaki la nyanja kwati kwawoneka kamutambu, Eliya wangukambiya Ahabu kuti: ‘Kutuza chimphepu. Kwera galeta laku, kanga kunyumba.’ Kuchanya kunguchita mudima chifukwa cha mitambu, kunguputa chimphepu ndipu kungwamba kuwa chivuwa chikulu. Pakumaliya, nja yingumala. Ahabu wanguyesesa kutchimbiza gareta laki. Yehova wanguchitisa kuti Eliya watchimbiyi kuluska gareta! Kumbi masuzgu ngosi ngaku Eliya ngangumaliya penapa? Tiyi tiwoni.