Misyobo iili kkumi yabwaami bwaIsrayeli yakali abaami bakali kuchita zibi, pesi Ahabbu wakaliindilide. Wakakwete mukayintu wakali kuchita zibi akukomba Bbaala. Zina lyakwe nguJezebbeli. Ahabbu aJezebbeli bakapa kuti bantu bakombe Bbaala alimwi bakajaya basinsimi baJehova. Jehova wakachitaanzi? Wakatuma musinsimi Eliya kuti akabuzye Ahabbu mulumbe uzwa kuli Leza.

Eliya wakabuzya Mwaami Ahabbu kuti mvula yakali kuyooleka kuwa muchisi chaIsrayeli akaambo kazibi zyakwe. Kwaminyaka iyinda kwiitatu, tekwakalikwe zilyo alimwi bantu bakafwa nzala. Jehova wakamutuma lubo Eliya kuli Ahabbu. Mwaami wakati: ‘Nduwe watweetela mapenzi. Nduwe wapa kuti kube oobu.’ Eliya wakasandula kati: ‘Teendime pe ndapa kuti mvula itawi. Pesi nduwe nkaambo ulikukomba Bbaala. Atuchite musunko uyootondeezya kuti ngwani Leza wakasimpe. Bungania bantu boonse abasinsimi baBbaala kuChilundu chaKarimeli.’

Bantu bakabungana kuchilundu. Eliya wakati: ‘Amuyeeyesesye kabotu. Ikuti Jehova nguLeza wakasimpe amumutobele. Ikuti nguBbaala amumutobele. Atuchite musunko. Basinsimi baBbaala bali 450 beelede kulibambila chipayizyo akwiita leza wabo andime ndiyoolibambila changu akwiita Jehova. Uyoosandula kwiinda mukweeta mulilo nguwe Leza wakasimpe.’ Bantu bakazumina.

Basinsimi baBbaala bakalibambila chituuzyo chabo. Buzuba boonse bakakwiilila leza wabo kabati: ‘O Bbaala kotuswiilila.’ Bbaala naakakachilwa kusandula, Eliya wakasaanguna kubafubaazya. Wakati: ‘Amukwiilisisye. Amwi ulikoona uyanda kubusigwa.’ Basinsimi baBbaala bakaliswini kukwiila kusika nilyakaba goko. Pesi Bbaala taakabasandula pe.

Eliya wakabikka chituuzyo chakwe achipayililo akuchitila maanzi. Wakakomba kati: ‘O Jehova, bantu abazibe kuti nduwe Leza wakasimpe.’ Chakufwambaana, Jehova wakeeta mulilo kuzwa kujulu mpawo wakuumpa chituuzyo. Bantu bakakwiila kabati: ‘Jehova nguLeza wakasimpe!’ Eliya  wakati: ‘Mutabalekeli basinsimi baBbaala kuti bachije!’ Buzuba oobo, kwakajayigwa basinsimi baBbaala bali 450.

Nikwakalibonia kayoba kazwa kulwizi, Eliya wakabuzya Ahabbu kuti: ‘Kuli mvula mpati iyanda kuwa. Kolibambila ngolo yako uyinke kung’anda.’ Kujulu kwakasiya, kwakaba luwo alimwi mvula mpati yakawa. Kuzwa waawo, bbalangwe lyakamana. Ahabbu wakachijaana angolo yakwe. Pesi Eliya wakagwasigwa aJehova alimwi wakachijaana akusiya ngolo! Pesi mapenzi aEliya akali amana na? Atubone.