Obukama obwa Isareri obw’enganda ikumi bukalemwa abakama baingi ababi, kandi Ahabu akaba omu ha bakama abakizireyo obubi. Akaswera omukazi enkozi y’ebibi ayaramyaga Baali, ruhanga ow’ebisuba. Ibara ly’omukazi onu niryo Yezeberi. Ahabu na mukazi we Yezeberi bakaletera abantu kuramya Baali kandi bakaita banabbi baingi aba Yahwe. Yahwe akakora ki? Akaha nabbi Eriya obutumwa abutwarre Ahabu.

Eriya akagambira Omukama Ahabu ngu, habw’ebibi bye, Isareri ekaba etarukugenda kutunga enjura. Abantu bakamara emyaka esatu batarukubyara eby’okulya, ekyalesere enjara y’amaani. Hanyuma y’akasumi Yahwe akongera yatuma Eriya hali Omukama Ahabu. Omukama akagambira Eriya ati: ‘Niiwe ndugirro y’akabi! Niiwe walesere ebizibu binu byona.’ Eriya akamugarukamu ati: ‘Tali ninyowe ayalesere enjara enu. Niiwe ayagiresere obu watandikire kuramya Baali. Katuteho ekirengeso. Sorooza ihanga lyona hamu n’abanabbi ba Baali ha Rusozi Karameri.’

Abantu obu bayesoroliize ha rusozi, Eriya akabagambira ati: ‘Mucwemu eky’okukora. Yahwe obwaraaba ali Ruhanga ow’amananu, mumukuratire. Baitu Baali obwaraaba nuwe ali Ruhanga ow’amananu, nuwe mukuratire. Tukole ekiregenso kinu, banabbi 450 aba Baali betekanize kuhonga n’okweta ruhanga wabo kandi nanyowe ninyija kwetekaniza kweta n’okuhongera Yahwe. Ruhanga arakozesa omurro kugarukamu, nuwe arayeyoleka kuba Ruhanga ow’amananu.’ Abantu boona bakaikirraniza nauwe.

Banabbi ba Baali bakatekaniza ekihongwa. Kandi bakamara ekiro kyona nibakunga ruhanga wabo nibagamba bati: ‘Ai Baali, tugarukemu!’ Baali obu yalemere kugarukamu, Eriya akabasekereza nagamba ati: ‘Mutokere kimu, nasobora kuba agwijagiire nayetagisa omuntu kumusisimura.’ Banabbi banu bakaikara nibeta Baali wabo kuhikira kimu rwebagyo baitu atabagarukemu.

Eriya akata ekihongwa kye ha kyoto kandi kyona yakisesera amaizi. Hanyuma akasaba n’agamba ati: ‘Ai Yahwe, nkwesengerize leka abantu banu bamanye ngu niiwe Ruhanga ow’amananu.’ Aho naho, Yahwe akasindika omurro  kuruga omu iguru gw’ayokya ekihongwa kyona. Abantu boona bakatokera haiguru nibagamba ngu: ‘Yahwe nuwe Ruhanga ow’amananu!’ Eriya akagamba ati: ‘Mutaikiriza nabbi wena owa Baali kutoroka!’ Ha kiro eki, banabbi ba Baali abarukuhika 450 bakaitwa.

Eriya obuyarozere ekicu haiguru y’enyanja, akagambira Ahabu ati: ‘Ihunga nirija. Tekaniza ekigaali kyawe, otaahe omu ka yawe.’ Ebicu ebirukwiragura bikasweka iguru, omuyaga gwatera, kandi enjura yamaani muno ekatandika kugwa. Obu nubwo ekyanda kyahoireho. Ahabu akairukya ekigaali kye. Yahwe akakonyera Eriya kwiruka yasiga ekigaali kya Ahabu! Baitu ebizibu bya Eriya bikaba bihoire? Katurole.