E rave rahi arii ino tei faatere i nia i na opu ahuru o Iseraela. O Ahaba, hoê o na arii ino roa ˈˈe. Ua faaipoipo oia i te hoê vahine ino mau o tei haamori ia Baala. O Iezebela to ˈna iˈoa. Ua ohipa amui Ahaba raua Iezebela ia î roa te fenua i te haamoriraa a Baala. Ua haapohe raua i te mau peropheta a Iehova. Eaha ta Iehova i rave? Ua tono oia i ta ˈna peropheta o Elia no te faatae ia Ahaba i te hoê poroi.

Ua parau Elia i te arii Ahaba e eita te ûa e topa faahou i Iseraela no to ˈna ino rahi. Hau atu toru matahiti i te maoro, aita te mau faaapu i tupu mai e ua pohe te nunaa i te poia. I muri iho, ua tono Iehova ia Elia no te farerei ia Ahaba. Ua parau te arii: ‘E taata faahuehue oe! Na oe te hape.’ Ua pahono atura Elia: ‘Aita vau i faatupu i teie paˈurâ. Na oe râ i faatupu i te reira no ta oe haamoriraa ia Baala. E faatupu anaˈe i te hoê tamataraa no te ite o vai te Atua mau. A putuputu mai i te nunaa e i te mau peropheta a Baala i nia i te mouˈa Karemela.’

Ua putuputu mai te nunaa i nia i te mouˈa. Ua parau Elia: ‘A maiti i teie nei. Mai te peu e o Iehova te Atua mau, a pee ia ˈna. Mai te peu e o Baala, a pee ia ˈna. Teie te tamataraa. Ia faaineine mai na peropheta a Baala e 450 i te hoê tusia e ia pii ratou i to ratou atua. E faaineine atoa vau i ta ˈu tusia e e pii atu vau ia Iehova. O te pahono mai ma te faaohipa i te auahi, o oia te Atua mau.’ Ua farii te nunaa i te reira.

Ua faaineine atura te mau peropheta a Baala i te hoê tusia. I te roaraa o te mahana, ua pii ratou i to ratou atua: ‘E Baala e, a pahono mai!’ Inaha aita o Baala i pahono mai, ua faaooo Elia ia ˈna. Ua parau oia: ‘A tuô puai mai. Ua taoto paha oia e mea tia ia haere e faaara ia ˈna.’ I te ahiahi, ua tuô noâ te mau peropheta a Baala. Aita râ e pahonoraa.

Ua tuu Elia i ta ˈna tusia i nia i te fata e ua manii oia i te pape i nia i te tusia. I muri iho, ua pure oia: ‘E Iehova e, a faaite na i tera nunaa e o oe te Atua mau.’ Oioi Iehova i te faatae atu i te auahi mai te raˈi mai no te faaama i te tusia. Ua tuô mai te nunaa: ‘O Iehova te Atua mau!’ Ua na ô Elia: ‘Eiaha te mau peropheta a Baala e ora mai!’ I  taua mahana ra, ua haapohehia na peropheta a Baala e 450.

A itehia ˈi te hoê ata nainai i nia ˈtu i te miti, ua parau Elia ia Ahaba: ‘Fatata mai te vero. A faaineine i to oe pereoo puaahorofenua e a hoˈi i te fare.’ Haamata ˈtura te ata i te haapoiri i te raˈi, te mataˈi i te puhipuhi e te ûa i te topa. Ua oti te tau paˈurâ. Ua faahoro vitiviti roa Ahaba i to ˈna pereoo puaahorofenua. Maoti te tauturu a Iehova, ua horo vitiviti aˈe Elia i te pereoo puaahorofenua! Ua oti anei râ te mau fifi atoa o Elia? O ta tâua ïa e ite.