Он аймак Израиль күрүнеге багай хааннар хөй турган, оларның бирээзи — Ахав. Ооң кадайы каржы чораан. Ол Ваал деп бурганга чүдүп турган. Ооң ады Иезавел. Ахав биле Иезавелдиң хайындан хөй израильчилер Ваалга чүдүп эгелээн. Иегова канчалган? Ол Илияны Ахавче коргунчуг медээлиг чоргузупкан.

Ахавка ооң каржы херектери дээш Израильге чаъс чагбас деп, Илия медеглээн. Үш чыл ажыг дүжүт чок болган, а улус аштап турган. Кезек үе болгаш, Иегова Илияны база катап Ахавче чоргузупкан. Хаан мынча дээн: «Бо бүгү сен дээш болган! Бо хай-халапка сен буруулуг сен». Илия харыылаан: «Каңдаашкын мээң буруум-биле эвес, а сен Ваалга чүдүй бээриңге эгелээн. Алыс шын Бурган: Иегова бе азы Ваал бе дээш хынаптаалы. Кармил дагның кырынга чонну база Ваалдың медээчилерин чыып ал».

Улус даг кырынга чыглып кээрге, Илия: «Бодангаш, шиитпирден үндүрүңер. Кайы Бурган алыс шын-дыр, ону эдериңер. Иегова бе азы Ваал бе? Ваалдың 450 медээчизи өргүлүн белеткеп алгаш, бурганын кыйгырзын, а мен өргүлүм белеткеп алгаш, Иегованы кыйгырар мен. Отту кым чорудуптар болдур, ол алыс шын Бурган болур» — дээн. Улус ынчан чөпшээрешкен.

Ваалдың медээчилери өргүлүн белеткеп алгаш, хүнзедир бурганын кыйгырып келген: «О Ваал, биске харыылап көрем!» Ынчалза-даа оозу харыылаваан. Ынчан Илия Ваалды кыжырып: «Ам-даа ыыткыр алгыржыңар! Ол удуй берген боор, ону оттурар болза эки эвес бе?» — дээн. Кежээ дүшкен. Ваалдың медээчилери алгыржып-ла турган, а харыы чок болган.

Илия өргүл бедигээжинге өргүлүн салгаш, олче сугну кудупкан. Оон ол мөргээн: «О Иегова, бо улуска алыс шын Бурган мен деп бодуңну көргүзүп көрем!» Иегова ол-ла дораан дээрден отту чорудуптарга, өргүл кыва берген. Улус: «Иегова — алыс шын Бурган-дыр!» — деп алгыржып эгелээн. Илия: «Ваалдың медээчилерин  дестирбеңер!» — деп алгырган. Ол хүн 450 меге медээчи өлүрткен.

Далайның кырынга бичии булут тыптып кээрге, Илия Ахавка мынча дээн: «Хат-шуурган кел чыдыр. Чуузаңче олурупкаш, бажыңыңче чана бер». Дээрни булуттар бүргей апкан. Хат хадып эгелээрге, суггур чаъс чаай берген. Каңдаашкын төнген! Ахав бар шаа-биле дыка дүрген халдып бар чыткан. А Илия Иегованың дузазы-биле ооң чуузазындан-даа дүрген маңнап чораан. Илия-биле улаштыр чүү болган, билип аалам.