Toj ep ajvaliletik ti chopol la sventainik li lajuneb nitilulal ta Israele, pe oy jun ajvalil ti mas toj chopol echʼe, jaʼ li Akabe. Nupun xchiʼuk jun chopol ants ti chichʼ ta mukʼ jecheʼ dios ti Baal sbie. Li ants taje Jesabel sbi, vaʼun li Akab xchiʼuk yajnile la sloʼlaik li krixchanoetik yoʼ xichʼik ta mukʼ li Baale. Jech xtok la smilbeik ep yaj-alkʼoptak li Jeovae. ¿Kʼusi van tspas li Jeovae? La stak batel yaj-alkʼop ti Elias sbi sventa oyuk kʼusi xbat yalbe li Akabe.

Li Eliase laj yalbe Akab ti muʼyuk chakʼ voʼ ta Israel ta skoj ti jaʼ jun chopol ajvalile. Jaʼ yuʼun muʼyuk xakʼ voʼ mas ta oxib jabil, muʼyuk kʼusi xchʼi li ta balumile xchiʼuk li krixchanoetike solel chchamik ta viʼnal. Ta tsʼakale, li Jeovae la stak batel yan velta Elias yoʼ xbat skʼopon li Akabe. Pe li ajvalil Akabe, xi laj yalbe li Eliase: «¡Voʼot ta amul ti jech ta xkil jvokolkutike!». Xi la stakʼ li Eliase: «Maʼuk ta jmul ti muʼyuk chakʼ voʼe. Jaʼ ta skoj ti jaʼ chavichʼ ta mukʼ li Baale. Jaʼ lek alo mantal ti akʼo stsob sbaik skotol li j-israeletik te ta vits Karmeloe xchiʼuk li j-alkʼopetik yuʼun Baale. Vaʼun jkʼeltik buchʼu ta smul».

Kʼalal te xa ox stsoboj sbaik ta vits Karmelo li j-israeletike, xi laj yal li Eliase: «Jaʼ yorail chatʼujik buchʼu ta stojolal chatunik, mi jaʼ ta stojolal li Jeovae o mi jaʼ ta stojolal li Baale». Jaʼ yuʼun li 450 yaj-alkʼop Baale xi albatike: «Meltsanik junuk milbil matanal, vaʼun skʼan chlik akʼoponik li adiosike. Jech ek li voʼone, ta jmeltsan jun milbil matanal xchiʼuk jaʼ ta jkʼopon li Jeova Dios kuʼune. Li buchʼu ta x-aʼibat skʼope xchiʼuk ti chtakbat tal kʼokʼ yuʼun li sdiose, jaʼ kuxul Dios ta melel unbi». Skotolik li j-israeletike la spasik li kʼusi laj yal li Eliase.

Vaʼun li j-alkʼopetik yuʼun Baale lik xchapanik li matanale xchiʼuk lik skʼoponik sjunul kʼakʼal li sdiosike, xi chalbeike: «¡Baal, takʼbun li jkʼopkutike!». Pe muʼyuk buchʼu xtakʼav, jaʼ yuʼun li Eliase xi lik yale: «Tsots xavaptaik yuʼun yikʼaluk yakal chvay, jech oxal tskʼan xatijik». Jech-o la spasik li j-alkʼopetik yuʼun Baale jaʼ to ti kʼuxi och li akʼobale. Pe muʼyuk takʼav li sdiosike.

Ta tsʼakale li Eliase laj yakʼbe smoton Jeova ta skajleb li matanale xchiʼuk laj yatʼes ta voʼ, vaʼun xi laj yalbe li Jeovae: «Kajval Jeova, akʼo ta ilel ti voʼot li melel Diosote». Kʼalal jech laj yale ta ora noʼox yal tal kʼokʼ ta vinajel xchiʼuk la xchikʼ li matanale, vaʼun xi lik avanikuk skotolike: «¡Li Jeovae, jaʼ Dios  ta melel!». Vaʼun li Eliase xi laj yale: «¡Mu me xavakʼik jatavuk junuk li yaj-alkʼoptak Baale!». Li vaʼ kʼakʼale laj yichʼik milel li 450 yaj-alkʼoptak Baale.

Ta tsʼakale te lik vinajuk uni jtsop tok te li ta nabe, vaʼun xi laj yalbe Akab li Eliase: «Chapano akareta xchiʼuk batan ta ana yuʼun ven chaukilvoʼ chtal». Vaʼun mak ta tok li vinajele, tal tsatsal ikʼ xchiʼuk tsots tajek laj yakʼ voʼ. Li Akabe muy ta skareta xchiʼuk bat ta anil, pe li Jeovae laj yakʼbe stsatsal li Elias yoʼ jaʼuk mas aniluk xbat ti mu jechuk li skareta Akabe. Pe, ¿mi te van laj-o svokol li Eliase? Jkʼeltik batel.