Muvhuso wa Isiraele wa tshaka dza fumi wo vha na mahosi mavhi manzhi, fhedzi Ahaba o vha o ṋaṋesa. O vhinga mufumakadzi muvhi we a vha a tshi rabela Baali. O vha a tshi pfi Isebele. Ahaba na Isebele vho ita uri shango ḽoṱhe ḽi rabele Baali nahone vha vhulaha na vhaporofita vha Yehova. Yehova o ita mini? O ruma muporofita Elia uri a ise mulaedza ha Ahaba.

Elia o vhudza Khosi Ahaba uri nga ṅwambo wa vhuvhi hawe, a hu nga ḓo na mvula kha ḽa Isiraele. Miṅwaha i fhiraho muraru, a ho ngo vha na zwiliṅwa nahone ha vha na nḓala. Nga murahu Yehova a dovha a ruma Elia kha Ahaba. Khosi ya ri: ‘Ni mudzia khakhathi! Hezwi zwoṱhe ndi mulandu waṋu.’ Elia a fhindula a ri: ‘A si nṋe ndo bveledzaho heḽi gomelelo. Ndi inwi nga ṅwambo wa u rabela Baali. Ri ḓo ita ndingo. Kuvhanganyani lushaka na vhaporofita vha Baali ni gonye Thavhani ya Karamele.’

Vhathu vha kuvhangana thavhani. Elia a ri: ‘Khethani zwino. Arali Yehova e Mudzimu wa ngoho, tevhelani ene. Arali e Baali, tevhelani ene. Ndi ita heyi ndingo. Vhaporofita vha 450 vha Baali vha fanela u ṋekedza zwiṱhavhelo na u vhidzelela mudzimu wavho, na nṋe ndi ḓo ita tshiṱhavhelo nahone nda vhidzelela Yehova. Ane a ḓo fhindula nga mulilo ndi ene Mudzimu wa ngoho.’ Vhathu vha tenda.

Vhaporofita vha Baali vha lugiselela tshiṱhavhelo. Vha vhidzelela mudzimu wavho ḓuvha ḽoṱhe vha ri: ‘Hee Baali, ri fhindule!’ Musi Baali a sa fhinduli, Elia a vha goḓa. A ri: ‘Vhidzelelani nga maanḓa. khamusi o eḓela, nahone muṅwe u tea u mu vusa.’ Ḽa kovhela, nahone vhaporofita vha Baali vha bvela phanḓa vha tshi khou vhidzelela. Fhedzi a ho ngo vha na phindulo.

Elia a vhea tshiṱhavhelo tshawe kha aletare nahone a tshi shela maḓi. Nga murahu a rabela a ri: ‘Yawee Yehova, ndi humbela u ri u sumbedze vhathu uri u Mudzimu wa ngoho.’ Nga u ṱavhanya, Yehova a ruma mulilo u bvaho ṱaḓulu wa fhisa tshiṱhavhelo. Vhathu vha vhidzelela vha ri: ‘Yehova ndi Mudzimu wa ngoho.’ Elia a ri: ‘Ni songo tendela vhaporofita  vha Baali vha tshi ponyoka!’ Nga ḽeneḽo ḓuvha, ha vhulawa vhaporofita vha Baali vha 450.

Musi hu tshi vhonala gole ḽiṱuku nṱha ha lwanzhe, Elia a vhudza Ahaba a ri: ‘Hu khou ḓa ḓumbu. Hakani gariki yaṋu nahone ni ye hayani.’ Lutombo lwa mbo ḓi swifhala nga makole, ha vhudzula muya, nahone ha thoma u na mvula khulwane. Mafheleloni, gomelelo ḽa fhela. Ahaba a tshimbidza gariki yawe nga luvhilo luhulwane vhukuma. A tshi thuswa nga Yehova, Elia o gidima nga luvhilo luhulwane vhukuma lu fhiraho na lwa gariki! Fhedzi naa vhuleme ha Elia ho vha ho fhela? Kha ri vhone.