Damu an maraot nga hadi han napulo ka tribo nga ginhadian han Israel, pero hi Ahab usa han pinakamaraot. Nag-asawa hiya hin maraot nga babaye nga nagsisingba kan Baal​—hi Jesebel. Tungod kanda Ahab ngan Jesebel nagsarang ha nasud an pagsingba kan Baal, ngan ira iginpapatay an mga propeta ni Jehova. Ano an ginbuhat ni Jehova? Iya ginsugo hi propeta Elias basi magsumat hin mensahe kan Ahab.

Ginsidngan ni Elias hi Hadi Ahab nga tungod han iya karaotan, diri mauran ha Israel. Ha sulod hin sobra tulo ka tuig, waray tumurok an mga tanom salit nagutom an mga tawo. Tapos, ginpabalik ni Jehova hi Elias kan Ahab. An hadi nagsiring: ‘Ikaw an hinungdan hini nga problema! Sala mo ini ngatanan.’ Hi Elias binaton: ‘Diri ako an hinungdan hini nga huraw, kondi ikaw kay nagsisingba ka kan Baal. Yana, sarihan naton kon hin-o an tinuod nga Dios. Tiroka an nasud ngan an mga propeta ni Baal ha pungkay han Bukid Carmel.’

Nagtirirok an mga tawo ha bukid. Hi Elias nagsiring: ‘Pagdesisyon na kamo. Kon hi Jehova an tinuod nga Dios, sunod kamo ha iya. Pero kon hi Baal, sunod kamo ha iya. Gin-aayat ko kamo. An 450 nga propeta ni Baal mag-andam hin halad ngan tawagon an ira dios, tapos mag-aandam ako hin halad ngan tatawagon ko hi Jehova. An bumaton pinaagi hin kalayo amo an tinuod nga Dios.’ Inuyon an katawohan.

An mga propeta ni Baal nag-andam hin halad. Gintinawag nira an ira dios ha bug-os nga adlaw, nga nasiring: ‘O Baal, batona kami!’ Han waray nabaton, gintinamay ni Elias hi Baal. Nagsiring hiya: ‘Dakua pa an iyo tingog. Bangin nakaturog hiya ngan kinahanglan pukawon.’ Tubtob ha gab-i, gintitinawag la gihap hi Baal han iya mga propeta. Pero waray la gihap nabaton ha ira.

Ginbutang ni Elias ha halaran an iya halad ngan ginbuhosan hin damu gud nga tubig. Katapos, nag-ampo hiya: ‘O Jehova, alayon ipakita ha katawohan nga ikaw an tinuod nga Dios.’ Nagpadara dayon hi Jehova hin kalayo tikang ha langit ngan ginsunog an halad. An katawohan nagsinggit: ‘Hi Jehova an tinuod nga Dios!’ Hi Elias  nagsiring: ‘Ayaw niyo tuguti nga makapalagiw an mga propeta ni Baal!’ Hito nga adlaw, ginpamatay an 450 nga propeta ni Baal.

Han may nakita nga gutiay nga dampog ha may dagat, ginsidngan ni Elias hi Ahab: ‘May tiabot nga bagyo. Sakay ha imo karuwahe, ngan uli.’ Nagsirom an kalangitan, nagkusog an hangin, ngan binunok. Natapos na gihap an huraw. Ginpadalagan ni Ahab hin madagmit gud an iya karuwahe. Pero ha bulig ni Jehova, naunahan pa ito ni Elias bisan kon nagdinalagan la hiya! Kondi waray na ba problema hi Elias? Aton kitaon.