Nisy panjaka ratsy fan̈ahy maro tamy fanjakan̈any Israely, fa Ahaba farany ratsy fan̈ahy. Nanambady man̈angy ratsy jery sady nanompo Bala izy, Jezebela an̈arany. Baka tamy Jezebela ndreky Ahaba nahavy olo maro nivavaka tamy Bala. Maro koa paminan̈iny Jehovah nivonendro. Akory nataony Jehovah? Izy nan̈iraka Elia paminan̈y hikoran̈a taminy Ahaba.

Elia nivolan̈a taminy Ahaba fa baka aminany nahavy maintany ta Israely. Tsisy vokatra foeky tan̈atiny telo taon̈o, ke tsisy hanin̈y foeky olo! Nalefany Jehovah taminy Ahaba tan̈y ndraiky Elia. Ho Ahaba taminany: ‘Baka aminao fo nahavy raha karaha ty!’ Ho Elia: ‘Aha! Baka aminao mivavaka amy Bala io fo nahavy izio. Avoria amy tendrony Bongo Karmela paminan̈iny Bala jiaby, fa ho hitantsika azovy ten̈a Zan̈ahary.’

Nivory tamy bongo io vahoaka. Ho Elia: ‘Tapaha hevitrinaro. Izikoa Jehovah ten̈a Zan̈ahary, mivavaha aminany, fa izikoa Bala, mivavaha aminany. Iraha man̈ano fan̈atitry paminan̈iny Bala 450 aby io, ke iraha mikaiky Bala iro. Zaho ndraiky han̈ano fan̈atitry ndreky hikaiky Jehovah. Zay mandatsaka motro, zen̈y ny ten̈a Zan̈ahary.’ Nan̈eky olo jiaby.

Nan̈ano fan̈atitry paminan̈iny Bala aby io. Nan̈ariva andra iro nikaiky zan̈aharindro: ‘A Bala e, valia kony zahay e!’ Tsy namaly foeky Bala, ke nitokizany Elia iro. Hoizy: ‘Ronton̈a marere ndraiky! Mety mbala mandry izy zay, ke mila fohazin̈y.’ Andra efa ho tsofotro, fa Bala mbala tsy namaly fo.

Nataony Elia tan̈abony alitara fan̈atitrinany, baka io nidin̈any rano. Nivavaka amy zay izy: ‘A Jehovah, ataova hainolo aby ty fa anao ten̈a Zan̈ahary.’ Niaraka vita vavakanany, Jehovah nandefa motro baka tandan̈itry nan̈oro fan̈atitrinany. Olo aby io nivolan̈a: ‘Jehovah ten̈a Zan̈ahary!’ Ho Elia: ‘Aza misy ambela  milefa paminan̈iny Bala!’ Tamy zen̈y, 450 paminan̈iny Bala naty.

Koa fa nisy rondro hely tan̈abony ranomasin̈y, ho Elia taminy Ahaba: ‘Ho avy mare mahalen̈y, ke tingena kalesinao, baka io mindao mody.’ Lan̈itry nanjary feno rondro joby, sady nisy tsiko naresaka, baka io latsaka nare mahalen̈y. Ela zay, fa navy eky mahalen̈y! Tapitry haintany be in̈y. Nandesiny Ahaba farany mare kalesinany. Jehovah nan̈ampy Elia, ke izy nahavita nilomoay nihoatra kalesiny Ahaba. Asa mba hilamin̈y eky fiain̈anany Elia? Alo zahavantsika.