Acayimwene ŵajinji ŵaŵalamulilaga ngosyo 10 sya Ayisalayeli ŵaliji ŵakusakala. Nambo Ahabu ŵaliji mwenye jwakusakala mnope. Jwalakwe jwalombele jwamkongwe jwakusakala juŵalambilaga Baala. Lina lya jwamkongweju lyaliji Yesebele. Ahabu yalumo ni ŵamkwakweŵa ŵatendekasisye kuti ŵandu ŵajinji alambileje Baala, soni ŵawuleje ŵakulocesya ŵa Yehofa. Ana Yehofa ŵatesile cici? Ŵatumisye jwakulocesya Eliya kuti akapelece utenga kwa Ahabu.

Eliya ŵamsalile Mwenye Ahabu kuti wula ngasijiyika m’cilambo ca Yisalayeli ligongo lyakuti Ahabujo ŵaliji mundu jwakusakala. Kwa yaka yakupunda yitatu, ŵandu ngapandaga mbeju. M’yoyo ŵanduwo ŵalasile ni sala. Kaneko Yehofa ŵamtumisyesoni jwakulocesya Eliya kwa Ahabu. Ni mwenyejo jwatite, ‘Mmweji mli mundu jwakusawusya, soni yosopeyi yikutendekwa ligongo lya mmwejo.’ Eliya jwajanjile kuti, ‘Salaji ngajikutendekwa ligongo lya une. Wawojo ni ŵajitendekasisye ligongo lyakulambila Baala kwawo. Kwende tulole yampaka tutende kuti tumanyilile jwali Mlungu jusyesyene.’ M’yoyo asonganye ŵandu ŵa mtundu wawo soni ŵakulocesya ŵa Baala penani pa Litumbi lya Kalimeli.’

Ŵanduwo ŵasongene pa litumbilyo. Eliya ŵatite, ‘Asagule Mlungu jumo, naga Yehofa ali Mlungu jusyesyene, amkuye jwalakwe. Naga ali Baala amkuye. Kwende tumanyilile yisyesyene. Ŵakulocesya ŵa Baala ŵakwana 450 alinganye mbopesi soni aŵende kwa mlungu jwawo, unesoni cilinganye mbopesi ni ciŵende kwa Yehofa. Mlungu jucatumisye moto ni jwali jusyesyene.’ Ŵanduwo ŵakamulene nayo.

M’yoyo ŵakulocesya ŵa Baala ŵalinganyisye mbopesi jawo. Lisiku lyosope jemanjajo ŵagumilaga kwa mlungu jwawo kuti, ‘Conde Baala, atujanje!’ Nambo nganajangaga, ni Eliya ŵatandite kumseka mlungujo kuti, ‘Agumile mnope. Mwine atenda gona, soni pakusosekwa kuti jwine akamjimusye.’ Ni ŵakulocesya ŵa Baala ŵajendelecele gumila mpaka kwaswele. Nambo pangali jwalijose juŵajangaga.

Eliya ŵaŵisile mbopesi jakwe pamalo gakupelecela mbopesi ni ŵajitasile mesi. Kaneko jwapopesile kuti, ‘Conde Yehofa, ŵakunde ŵanduŵa amanyilile kuti wawojo ali Mlungu  jusyesyene.’ Mwangacelewa, Yehofa ŵatumisye moto kutyocela kwinani ni kutinisya mbopesijo. Ŵandu ŵala ŵagumisile kuti, ‘Yehofa ni jwali Mlungu jusyesyene!’ Eliya jwatite, ‘Akakunda kuti ŵakulocesya ŵa Baala atile.’ Lisiku lyelelyo, ŵakulocesya ŵa Baala ŵakwana 450 ŵawulajidwe.

Kaliwunde kamwana pakawonecele ca kunyasa, Eliya ŵamsalile Ahabu kuti, ‘Kukwika wula jamacili. Mkwele ligeleta lyenu ni mjawule kumangwenu.’ Kaneko kusa kwatesile cipi ni mawunde, mbungo japujile mnope, ni kwayice wula jamacili. M’yoyo sala jila jamasile. Ahabu paŵawujaga, ŵawutusyaga ligeleta lyakwe. Nambo ni cikamucisyo ca Yehofa, Eliya jwawutwice mnope kulipunda ligeleta lya Ahabulyo. Nambo ana yakusawusya ya Eliya yamalile pelepa? Kwende tulole.