Tu reinoil u 10 tribus Israeleʼ anchaj yaʼab kʼasaʼan reyoʼobiʼ, chéen baʼaleʼ Acabeʼ, juntúul tiʼ le máaxoʼob maas kʼasaʼanoʼob anchajoʼ. Letiʼeʼ tsʼoʼok u beel yéetel Jezabel, juntúul kʼasaʼan koʼolel ku adorartik kaʼach le dios Baaloʼ. Acab yéetel Jezabeleʼ tu beetoʼob u adorartaʼal Baal tumen yaʼab máakoʼob. Tu beetoʼob xan u kíimsaʼal yaʼab tiʼ u profetaʼob Jéeoba. ¿Baʼax túun tu beetaj Jéeoba? Tu túuxtaj profeta Elías u yaʼal tiʼ Acab baʼax kun úuchul.

Elíaseʼ tu yaʼalaj tiʼ Acab maʼ kun kʼáaxal jaʼ tu luʼumil Israel, tumen letiʼeʼ juntúul rey jach kʼasaʼan. Maas tiʼ tres años maʼ anchaj baʼal jaantbiliʼ. Ka tsʼoʼokeʼ Jéeobaeʼ tu kaʼa túuxtaj Elías yiknal Acab. Le rey Acaboʼ tu yaʼalaj tiʼ Elías: ‹Techeʼ chéen ka beetik u yantal problemaʼob. Ta woʼolaleʼ táan u yúuchul tuláakal lelaʼ›. Elíaseʼ tu yaʼalajtiʼ: ‹Maʼ teen beetik maʼ u kʼáaxal jaʼiʼ. Táan u beetik yáaxkʼiin tumen táan a adorartik Baal. Muchʼkíint le kaaj bey xan u profetaʼob Baal teʼ tu puʼukil Carmelooʼ. Teʼeloʼ yaan u yeʼesaʼal máax le u jaajil Diosoʼ›.

Le kaaj túunoʼ muchʼlaj teʼ puʼukoʼ, ka aʼalaʼabtiʼob tumen Elías: ‹Unaj a yéeyikeʼex máax ken a adorarteʼex. Wa Jéeoba u jaajil Dioseʼ, xeeneʼex tu paach. Chéen baʼaleʼ wa Baal letiʼ u jaajil diosoʼ, xeeneʼex tu paach letiʼ. Koʼox beetik lelaʼ: u 450 profetaʼob Baaleʼ yaan u kʼubkoʼob juntúul kíimsbil baʼalcheʼ yéetel u tʼankoʼob u dios. Teen xaneʼ yaan in kʼubik juntúul kíimsbil baʼalcheʼ yéetel yaan in tʼanik Jéeoba. Le dios ken u túuxt kʼáakʼoʼ letiʼe u jaajil Diosoʼ›. Le kaajoʼ tu yaʼalaj yaan u beetik le baʼax tu yaʼalaj Elíasoʼ.

Bey túunoʼ u profetaʼob Baaleʼ tu kʼuboʼob le kíimsbil baʼalcheʼoʼ. Letiʼobeʼ búul kʼiin táan kaʼach u tʼankoʼob le dios ku adorartikoʼoboʼ, joʼopʼ u yaʼalikoʼob: ‹¡Baal, núuk k-tʼaaniʼ!›. Chéen baʼaleʼ Elíaseʼ joʼopʼ u burlartikoʼob tumen Baaleʼ maʼ tu núukaj u tʼaanoʼobiʼ. Joʼopʼ u yaʼaliktiʼob: ‹Kʼaʼam tʼaneʼex. Maʼ xaaneʼ weeni yéetel kʼaʼabéet u yajsaʼal tumen wa máax›. Le profetaʼoboʼ seguernaj u tʼankoʼob Baal óoliʼ tak ka áakʼabchaji, chéen baʼaleʼ maʼ núukaʼab tiʼobiʼ.

Elíaseʼ tu tsʼáaj le tóokbil baʼalcheʼ teʼ altaroʼ ka tu wekaj jaʼ tu yóokʼol. Ka tsʼoʼokeʼ tu yaʼalaj: ‹Kiʼichkelem Yuum Jéeoba, núuk in tʼaaniʼ, utiaʼal ka u yil le kaaj chéen teech u jaajil Diosoʼ›. Tu séebaʼanileʼ Jéeobaeʼ tu túuxtaj kʼáakʼ desde teʼ kaʼanoʼ ka tu tóokaj le baʼalcheʼ yaan teʼ altaroʼ. Le máakoʼoboʼ  tu kʼaʼam aʼaloʼob: ‹¡Jéeoba u jaajil Dios!›. Ka tsʼoʼokeʼ Elíaseʼ tu yaʼalaj: ‹Maʼ a chaʼikeʼex u púutsʼul mix juntúul tiʼ u profetaʼob Baal›. Teʼ kʼiin jeʼeloʼ kíimsaʼab le u 450 profetaʼob Baaloʼ.

Ka tsʼoʼokeʼ chíikpaj junpʼéel chan múuyal yóokʼol le kʼáaʼnáaboʼ. Elías túuneʼ tu yaʼalaj tiʼ Acab: ‹Jeʼel ku taal junpʼéel kʼaʼamkach jaʼoʼ. Preparart a carro ka xiʼikech ta wotoch›. Teʼ súutukoʼ sen nookoychajeʼ ka éeʼjochʼeʼenchaj le kaʼanoʼ, tsʼoʼoleʼ kʼaʼamchaj le iikʼoʼ ka káaj u kʼáaxal junpʼéel kʼaʼamkach jaʼ. Bey xuʼulik le yáaxkʼiinoʼ. Acabeʼ jach chich úuchik u bin yéetel u carro. Pero Jéeobaeʼ tu yáantaj Elías utiaʼal ka áalkabnak maas chich. Koʼox ilik wa xu’ul tuláakal le baʼax táan u aktáantik Elíasoʼ.