Lu reinu de chii tribu que guyuu stale rey malu, peru Acab guca tobi de ca rey jma malu. Bichaganabe Jezabel, ti gunaa guizáʼ mala ni biʼniʼ adorar dios Baal. Bicaa Acab ne Jezabel stale binni guni adorarcaʼ dios Baal. Laaca biiticabe stale profeta stiʼ Jiobá. ¿Xi biʼniʼ Jiobá yaʼ? Biseendabe profeta Elías ra nuu Acab para gabi laabe xiixa.

Gudxi Elías Acab qué ziaba nisaguié Israel purtiʼ nácabe ti rey guizáʼ malu. Jma de chonna iza, qué nudii ca layú stícabe gastiʼ, ngue runi guizáʼ bindaana ca binni que. Despué, biseendaʼ Jiobá Elías cheʼ ne guiniʼné Acab sti biaje. Gudxi rey Acab Elías: «Lii nápaluʼ donda pur guiráʼ ni cazaacaʼ riʼ». Bicabi Elías laabe: «Cadi naadiáʼ napaʼ donda cadi cayaba nisaguié. Gastiʼ ni gó binni purtiʼ cayuni adorarluʼ Baal. Bichiña guidxi ca ne ca profeta stiʼ Baal ique dani Carmelo. Guidúʼyanu tuu nga Dios ni dxandíʼ».

Bidxiña guidxi que ique dani que, ne óraque gudxi Elías laacabe: «Naquiiñeʼ cuitu tu guni adorartu. Pa Jiobá nga Dios ni dxandíʼ la? lachinanda laa. Peru pa Baal nga laani la? lachinanda laa. Yanna guidúʼyanu tuu nga Dios ni dxandíʼ ca: naquiiñeʼ guni tapa gayuaa cincuenta profeta stiʼ Baal ti ofrenda ne gucaacaʼ ridxi dios sticaʼ. Naa laaca zuneʼ ti ofrenda ne zucaaridxeʼ Jiobá, dios ni gusaba gui lu ofrenda stiʼ, nga nga Dios ni dxandíʼ». Guidxi que guníʼ zuni ni ná Elías.

Óraque, biʼniʼ ca profeta stiʼ Baal ti ofrenda. Bicaacaʼ ridxi dios sticaʼ guidubi dxi, ne naca: «Baal, bicabi laadu». Cumu cadi cacabi Baal la? biʼniʼ burla Elías Baal ra guníʼ: «Lagucaa ridxi laabe jma reciu. Zándaca nisiaasibe ne caquiiñeʼ tu gucuaaniʼ laabe». Mayaca guixhinni, ne cucaaruʼ ca profeta que ridxi Baal, peru guirutiʼ nicabi laacaʼ.

Gudixhe Elías ofrenda stiʼ lu altar que ne bichabe ziáʼ nisa luni. Despué biʼniʼ orarbe: «Jiobá, guʼyaʼ guidxi riʼ lii nga Dios ni dxandíʼ». Óraque bisaba Jiobá gui de guibáʼ ne bizaaquiʼ ofrenda que. Bicaa ca binni que ridxi: «¡Jiobá nga Dios ni dxandíʼ!». Óraque guníʼ Elías: «Cadi gudiitu  lugar guxooñeʼ nin ti profeta stiʼ Baal». Dxi que, biiticabe tapa gayuaa cincuenta profeta stiʼ Baal.

Despué, bihuinni ti za huiiniʼ lu nisadóʼ, ne gudxi Elías Acab: «Zedadxiña ti nisaguié naroʼbaʼ. Gudxiʼbaʼ lu carru stiluʼ ne guyé ra lídxiluʼ». Bicahui guibáʼ, bindubi ti bi ne bizulú biaba nisaguié guizáʼ reciu. Yanna huaxa maʼ ziuu ni gó binni. Nagueendaca gucuaa Acab carru stiʼ ne biree zeʼ. Gucané Jiobá Elías para guxooñeʼ jma nagueenda que carru ra zeʼ Acab. ¿Ñee rábiluʼ maʼ qué zadxaagalú Elías guendanagana la? Guidúʼyanu ni.