Gu kindo nangia ga aYisaraere naadu na angbatunga bawe adu na dungu gbegberẽ sino abakindo, ono Aba sinoko agberẽ kisusi ga aguyo dunduko. Ko adi kere gbigbita sino dee naairiso Bara. Rimori angia Izebere. Aba gbiati Izebere asa aboro dũ rogo ringara i niirisi Bara na ki imi dungu ga Yekova anebi. Ginipai Yekova amangihe? Ko akedi gu nebi nangia Eriya ko ndu na pangbanga fu Aba.

Eriya aya fu Bakindo Aba wẽ, mbiko gako gbegberẽ mangaapai, mai ho nika na ku rogo ringara Yisaraere te. Tipa agarã naima susa biata, gomoro ati kurii aboro mbiko rukuruku ahe aasonanga te. Kusa Yekova akedi Eriya berewe koyo du Aba ni. Bakindo aya: ‘Mo nga boro gbatapai! Mo sa gi ugure re si mangi.’ Eriya akaragapai ki ya: ‘Anga mi sa gi ugure re si mangi te. Mo du saha si mangi mbiko mo nairiso Bara. Ani nika asadapai. Mo dungura aboro dunduko gbiati ga Bara anebi kurii Bagangara Karumera yo.’

Aboro adunguratiyo kurii bagangara yo. Eriya aya: ‘Oni mangi siapai. Ka singia Yekova nga ndikidi Mbori, oni irisiko. Ka sidu nga Bara du, oni nasia ka irisoko oni irisi kina ko. Mi naida ani mangi gipai du re. Si naida agu anebi nga ga Bara yo du nga 450 mbakadi zozo motumo ki kpari ti rimo gayo mbori na mi tigimi nika mbakada zozo motumo ki kpari ti rimo Yekova. Gu Mbori nika karagapai ni we ni nga ndikidi Mbori.’ Aboro ki idi kuti gupai re.

Ga Bara anebi ki mbakadi zozo motumo. I kini kpari fu gayo mbori rogo gu uru re pitipiti niya: ‘Ako Bara mo karagapai furani!’ Ho Bara aakaraganga pai niya, Eriya atona ka sawia ko. Ko aya: ‘Oni kpari ni wawa na fugoroni kuari. Da inihe singia rame ima zioko, nga gu si aida boro nduandu ka zingisako rogoho.’ Nyemu ada ga Bara anebi ki nikpari kindi fuko. Ono karagapai aadunga te.

Eriya amoi gako zozo motumo kurii ba zo motumo ki uka ime rihe kirikiri. Fuoho, ko akpari nga: ‘Ako Yekova mi na zungudi ro aboro inihe nga mo nga ndikidi Mbori.’ Nibasa, Yekova akedi we ngbangbaturũ yo si ki zo gu motumo re. Aboro ki poi kuari ki ya: ‘Yekova nga ndikidi Mbori!’ Eriya aya:  ‘Ka oni mbunga ga Bara anebi i bati ya!’ Rogo gu uru re, gu ga Bara anebi naadu nga 450 akpiki dunduko.

Ho wiri dubo akuru ni barii ime, Eriya aya fu Aba: ‘Bavugumo mai naye. Mo di ga ngbagidavura ki ga ku kpuro yo.’ Vuro ngbangbaturũ abiri be mai, wege kini ya, na bakere nana mai ki tona ka na. Ni yangara, ugure ago kusayo. Aba aoro na gako ngbagidavura na kere oto wa omeko arengbe na ni. Mbiko ga Yekova undo, Eriya aoro ni nduko kisusi ngbagidavura! Ono ya mo gure nangia digido ga Eriya akpakarapai? Ani bingoho.