Kinde ma Yezebel uwinjo nia junego jubila pa Bal, kwinyo umake ma rac. Eoro jucidh juyer ni Eliya kumae: ‘Urwo in de jubinegi calu m’inego jubila pa Bal.’ E lworo umondo i Eliya man eringo i langa. Erwo kumae: ‘Yehova, kero para daru thum. Timba dong’ atho cen.’ Calu m’eol lee, ewok ebedo i the yen moko, e nindo ukwale.

Malaika moko ucewe man ewacu ire nya yo yo kumae: ‘Keai icam cam moko.’ Eliya neno lungu kwen ma juketho iwi kidi ma lieth ku cupa mi pii i ng’ete. Eai malu, ecamu, emadhu pii man edok enindo kendo. I ng’eye, malaikane ucewe kendo man ewacu ire kumae: ‘Ai icam, kara inwang’ kero pilembe ibecidho i woth ma bor.’ Eliya uai man ecamu kendo. E ewotho ceng’ 40 ku diewor 40 nitundo i kum got Horeb. Kuca, ewok emondo i odicana moko kara enindi. Ento Yehova uweco i bang’e man ewacu ire kumae: ‘Eliya, itimo ang’o keni?’ Eliya udwoko kumae: ‘Juisrael giworo ngo lembe ma ging’olo iri. Ginyotho pemblam man ginego jubila peri. Kawoni gimito gineg an de.’

Yehova uyero ni Eliya kumae: ‘Wok icidh icung iwi got.’ Mi kwong’o, yamu moko ma tek ukoto keca. Mir ario, digidi ma dit uyengo piny; man mir adek, mac ucaku liel. I ng’eye, Eliya uwinjo dwal moko ma yo ubeweco i bang’e. E eumo wang’e ku bongu pare man ecidh ecungo i dhu odicana. Yehova upenje kumae: ‘Iberingo ang’o?’ Eliya udwoko kumae: ‘Ani kenda re m’adong’ abetimo iri.’ Ento Yehova uyero ire kumae: ‘Idong’ ini kendi ngo. Dhanu mange 7 000 de ginuti i Israel ma gibetimo ira. Cidh iketh Elica ni jabila ma bidong’ kakeri.’ E ndhundhu nica Eliya cidh utimo lembe ma Yehova ung’olo ire. Nyo iparu nia in de Yehova bikonyi kan ibetimo yeny pare? Eyo, ebikonyi. Wakenen lembe moko m’utimere ma nwang’u fodi koth udwogo ngo.