Jezabel warmejja Baal diosan profetanakapar jiwarayapjjatap yatisajj wal colerasïna. Ukatwa Elías profetar akham saniñapatak khitäna: ‘Baal diosan profetanakapjamarakiw qharürojj jiwäta’ sasa. Uk istʼasajja Eliasajj wal ajjsaräna, ukatwa wasarar sarjjäna. Ukanwa akham orasïna: ‘Jehová Dios, janiw aguantirjamäjjti. Jiwjjañ munta’ sasa. Eliasajj wali qaritaw mä ali kʼuchun iktʼjjäna.

Mä angelaw sartayasajj qoña arumpi akham säna: ‘Sartasin manqtʼasim’ sasa. Eliasajj pari qalanak patjjan mä moroqʼo tʼantʼampi umani jarrampi uñjäna. Jupasti umtʼasïnwa manqtʼasirakïnwa, ukatjja wasitat iktʼjjäna. Angelajj mayamp sartayasajj akham sänwa: ‘Manqtʼasim. Viajen aguantañatak manqʼasiñamawa’ sasa. Ukatwa Eliasajj mä jukʼamp manqtʼasïna. Ukatsti 40 uruy arumaw Horeb qollur puriñkam saräna. Mä qollu pʼiyaruw iktʼañatak mantäna. Ukanjja Diosajj akham sänwa: ‘Elías, ¿kunsa akan luraskta?’ sasa. Eliasajj sarakïnwa: ‘Israelitanakajj janiw promesap phoqapktamti. Altaranakam qʼal tʼunthapipjje, profetanakamarus jiwarayapjjewa. Jichhajj nayamppacharuw jiwayañ munapjjetu’ sasa.

Jehová Diosajj Eliasar sänwa: ‘Akat mistusajj qollun saytʼasim’ sasa. Ukatjja thayaw wali chʼamampi thaytʼanïna. Oraqes wal khatatirakïna. Qheparusti ninaw nakharakïna. Ukatjja Eliasajj jiskʼat parliri mä qoña aru istʼäna. Ukatwa ajanup isipamp imantasïna, qollu pʼiya anqäjjanwa sayaskarakïna. Jehová Diosajj ‘kunatsa escapanta’ sasaw jisktʼäna. Eliasasti sarakïnwa: ‘Profetanakatjja nayakiw jiltʼjjta’ sasa. Jehová Diosajj sänwa: ‘Janiw sapäktati. Israelanjja 7.000 jaqenakaw nayar adorasipkitu. Jichhajj Eliseor profetat uttʼayanim, jupaw jumjjarojj profetat servitani’ sasa. Eliasajj Diosan arunakap phoqeriw saräna. Jumajj Jehová Diosar istʼapunïta ukhajja, ¿janit jupajj yanapkarakïtamjja? Wal yanaptʼätamjja. Jichhajja waña maranakan kunas pasäna uk yatjjatañäni.