Yézabel a bi nok jam li bi pémél bapôdôl ba Baal, a unup ngandak. A ômle Élia nwin le: ‘Yani, u ga nôla kiki bapôdôl ba Baal.’ Hala a bi kônha Élia woñi, a ôt ngwéé i ñoñ. A soohe le: ‘A Yéhôva, hala a kôli. Yoñ niñ yem.’ Kiki a bé ntombok kiyaga, Élia a nañal i si e.

Añgel yada i tôdôl nye mbeñee, i kal nye le: ‘Telep, u je.’ Élia a telep, a tehe mbômôk ôlô u nlék i ngii ngok, ni sop malép. A je, a nyo, a témb ’ilo. Añgel i témb i tôdôl nye, i kal le: ‘Je. W’a bana ngôñ ni ngui inyu liké joñ.’ Élia a témb a je. A ke liké 40 ma dilo, juu ni njamuha, teeni Hikôa Hôreb. Nyoo Élia a jôp i hôk liaa, le a nañal mu. Ndi Yéhôva a pôdôs Élia, a kal nye le: ‘A Élia, kii u mboñ hana?’ Élia a timbhe le: ‘Bon ba Israel ba bi tjôô malômbla moñ. Ba bôk muu moñ ma bisesema, ba nol ki bapôdôl boñ. Hanano ba nyéñ nol yak me.’

Yéhôva a kal nye le: ‘Ke telep ngii hikôa.’ Jam li bisu, soso mbuk mbebi a hôñ. I mbus ngéda hisi hi nyeñg, hié hi pam. I sôk bañ, homa a mom nwee, Élia a nok himaga hi kiñ si. A hô su wé ni kôti, a telep ha lijubul li hôk liaa. Yéhôva a bat nye inyuki a kenek ngwéé. Élia a timbhe le: ‘Metama nyen me yii niñ.’ Ndi Yéhôva a kônde kal nye le: ‘U yii bé wetama. 7 000 di bôt ikété loñ Israel di ngi béghak me. Kenek, téé Élisa kiki mpôdôl i mbus yoñ.’ Élia a pala boñ yom Yéhôva a bat nye. Baa u nhoñol le Yéhôva a nla hôla yak we ngéda u mboñ yom a mbat we? Ñ, a’ hôla. Di béñge jam li bi tagbe i ngéda sép keñi.