Ilyo Yesebele aumfwile ifyacitikile bakasesema ba kwa Baali, alifulilwe sana. Atumine abakuyaeba Eliya ati: ‘Mailo ukafwa nga filya fine bakasesema ba kwa Baali bafwile.’ Eliya alitiinine sana ica kuti abutukiile mu matololo. Apepele ati: ‘Mwe Yehova, nanaka. Lekeni fye mfwe.’ Apo Eliya alinakile, alyumfwile utulo kabili aleele mwi samba lya cimuti.

Malaika alimubushishe kabili amwebele ati: ‘Ima, ulye.’ Eliya amwene umukate uli pa mabwe ayakaba na menshi muli kapu. Abulile ifya kulya alya anwa na menshi, e lyo alaala na kabili. Na kabili malaika alimubushishe no kumweba ati: ‘Lya, pa kuti ukwate amaka ya kwenda.’ Eliya aliliile na kabili. E lyo atendeke ukwenda, kabili alyendele inshiku 40 akasuba no bushiku, mpaka afika ku Lupili lwa Horebu. Lyena Eliya aingile mu lucengo no kulaala. Lelo Yehova alilandile nankwe. Amwipwishe ati: ‘Eliya cinshi ulecita kuno?’ Eliya ayaswike ati: ‘Abena Israele nabafilwa ukucita ifyo bamulaile. Balyonaula ifiipailo kabili na bakasesema benu balibepaya. Na ine wine balefwaya ukunjipaya.’

Yehova aebele Eliya ati: ‘Kabiye keminine pa lupili.’ Kwaishile umwela uukalamba kabili uukali. Pa numa ya mwela, umushili walitendeke ukutenkana e lyo kwaishile umulilo. Pa numa ya ifi, Eliya aumfwile ishiwi ilyanakilila. Eliya aifimbile ica kufwala cakwe pa menso e lyo aiminina pa nse ya lucengo. E lyo Yehova amwipwishe ico abutukiile. Eliya alandile ati: ‘Nshelepo fye neka.’ Lelo Yehova amwebele ati: ‘Awe, te iwe fye ushelepo. Kuli na bambi 7,000 abampepa. Kabiye kasonte Elisha ukuba kasesema, e ukakupyana.’ Apo pene Eliya alile mu kucita ifyo Yehova amwebele. Bushe ulemona ukuti na iwe Yehova kuti akwafwa nga ulecita ifyo akweba ukucita? Ee akakwafwa. Natumone ifyacitike ilyo kwali icilala.