Rofyor Izebel ryower rosai ḇekur nabi Baal sya, imsor fafayaḇa. Fyarem anun faro Elia i, ’Meser ido na wamar raris nabi Baal ansi.’ Elia imkak kaku ma ifrar ḇe sup ḇeursḇa. Ḇyenadi ḇo doḇo, ’Yahwe yo, iḇye kwar. Ḇeya fa yamar mura.’ Ramnai, snar imbrus Elia denef ro aiknam fuar.

Malaikat ḇyan Elia ma dawos myaren ḇe i, ’Wakboke ma wanan.’ Elia myam mamami ḇesapdupen ḇero karui barapen bori ma rosaser ḇeser ware. Dan ma dinem raposa denef wer. Malaikat ani ḇyani wer ma doḇe, ’Wan, insama swambraḇ fa wambran wer.’ Inja, Elia danan wer. Mura, imbran ro ras ma roḇ ri 40 rawo ifyafer ro Bon Horeb. Ro diwa Elia syun ḇe aḇyaḇ oso fa denef. Ḇape Yahwe ikofen ḇe i, ’Elia, rosai wafrur ro dineni?’ Elia kyarem, ’Snonkaku Israel siyuk kwar asas sifrur yoḇ Au. Simkok rokef farsarser Bedi ma smun nabi Besya fa simar. Kirine sisewar fa imbe smun aya kako.’

Yahwe ikofen ḇe i, ’Wores ro bandi.’ Randak ya, wamya ipok kaku. Mura, saprop ya imer ma forya isya. Ramnai, Elia ryower mkaren ḇebaḇa berok myaren. Ikawef mkasi kuker syatu ḇyeja ma dores ro aḇyaḇ ya bandiri. Mura Yahwe ifuken rosai ḇefnai iyokef mankundi. Elia kyarem, ’Kirine yerer monda ḇefarmyan ḇe Au.’ Ḇape Yahwe ikofen ḇe i, ’Werer monda ḇa. Snonkaku Israel ri 7.000 sisya kaker ḇesyom Aya. Rwa ma rwem Elisa i ḇe nabi fa fyadwer au.’ Elia rya beri fa ifrur rosai Yahwe ikofen ḇe i na. Kakara bedi ido, Yahwe nari dakfnoḇek au kako rofyor wafrur marisen Ḇyena ke? Imbo ḇae.  Rwama komam rosai ḇeḇesya ya fafisu dares iba myun kaker.