Merawa kel Isebel sanga ibegina si terjadi man nabi-nabi Baal e. Emaka ikirimna surat man Elia, nina, ‘Kam pe pasti mate pagi bagi nabi-nabi Baal e.’ Mbiar kel nabi Elia sanga ibegina isi surat e janah kiam ia ku gurun. Ertoto ia nina, ‘Jahwe, lanai aku tahan. Pangen me aku mate.’ Perban latih kel iakap Elia, tertunduh ia i teruh batang kayu.

Reh me sada malekat, imedakina si Elia, janah nina, ‘Medakken. Man kam.’ Medak Elia janah idahna roti ras guci lau i datas tungku batu. Kenca dung ia man ras minem tunduh ka ia mulihi. Imedaki malekat e ka ia janah nina, ‘Man kam. Gelah megegeh kam erdalan.’ Emaka man ka Elia. Kenca si e, erdalan ia 40 wari 40 berngi seh ku Gunung Horeb. Masuk Elia ku sada gua janah tunduh ia i je. Tapi ngerana Jahwe man ia nina, ‘Erkai kam i jenda Elia?’ Nina Elia ngaloisa, ‘Nggo ilanggar kalak Israel janjina man baNdu. Nggo iruntuhkenna ingan persembahenNdu ras ibunuhna nabi-nabiNdu. Gundari aku pe ibunuhna atena.’

Nina Jahwe, ‘To lawes kam ku datas gunung.’ Tangtangna, iban Jahwe angin si meter si mentas arah gua e. Kenca si e, lit ka linur ras api. Dungna, ibegi Elia sada sora si lembut. Itutupi Elia ayona alu uisna janah cinder ia i darat gua e. Nce, isungkun Jahwe engkai maka ia kiam. Nina Elia ngaloi, ‘Perban lanai lit temanku.’ Tapi nina Jahwe man Elia, ‘Labo kam sisada. Lit denga 7.000 kalak Israel si nembah Aku. Laweslah kam janah pilihlah Elisa nggantiken kam jadi nabi.’ Emaka ilakoken Elia kai si ikataken Jahwe. Menurutndu nggit nge Jahwe nampati kam adi ilakokenndu perentahNa? Ue, pasti isampatiNa kam. Mari sinen kai si terjadi sanga musim perlego.