Nasuko kaayo si Jezebel dihang iyang nahibaloan ang nahitabo sa mga propeta ni Baal. Nagpadala siyag mensahe kang Elias: ‘Mamatay ka ugma pareho sa mga propeta ni Baal.’ Nahadlok kaayo si Elias, maong miikyas siya paingon sa kamingawan ug miampo: ‘Di na nako ni kaya Jehova. Patya na lang ko.’ Sa kakapoy, nakatulog siya sa ilalom sa kahoy.

Gipukaw siya sa usa ka anghel ug giingnan: ‘Bangon ug kaon.’ Nakita ni Elias nga may lingin nga tinapay ibabaw sa gipainit nga mga bato ug may sudlanan sa tubig. Mikaon siya, miinom, ug mibalik ug katulog. Gipukaw na pod siya sa anghel ug giingnan: ‘Kaon kay kinahanglan kag kusog sa imong pagbiyahe.’ Busa mikaon na sab siya. Dayon mibiyahe siyag 40 ka adlaw ug 40 ka gabii hangtod nga naabot siya sa Bukid sa Horeb. Misulod siya sa usa ka langob aron matulog. Pero nakig-estorya si Jehova niya ug miingon: ‘Nganong naa ka diri, Elias?’ Si Elias mitubag: ‘Wala tumana sa mga Israelinhon ang ilang saad nimo. Ilang giguba ang imong mga halaran ug gipamatay ang imong mga propeta. Ug karon gusto ko nilang patyon.’

Si Jehova miingon kaniya: ‘Adto sa gawas.’ Ug dihay kusog nga hangin. Dayon naglinog ug unya dihay kalayo. Unya nakadungog siyag kalma ug hinay nga tingog. Gitabonan niyag sinina ang iyang nawong, ug migawas siya sa langob. Dayon nangutana si Jehova kon nganong miikyas siya. Mitubag siya: ‘Ako na lang ang nabilin.’ Pero giingnan siya ni Jehova: ‘Wala ka mag-inusara. Naa pay 7,000 sa Israel nga nag-alagad nako. Lakaw ug pahibaloa si Eliseo nga siya ang mopuli nimo nga propeta.’ Dihadiha milakaw si Elias aron tumanon ang gisugo ni Jehova. Tabangan pod kaha ka ni Jehova kon imo siyang sundon? Oo, tabangan ka niya. Tan-awon nato kon unsay nahitabo panahon sa hulaw.