Jezebele yevwa yuma yize yalingiwile kuli aprofeta a Mbale, chocho yevwa uli unji. Iye yatuma lusango kuli Eliya ngwenyi: ‘Hamene, yena mufwa ngwe chize afwanga aprofeta a Mbale.’ Eliya yevwa woma unji, chocho yachinyina mu puya. Iye yalemba ngwenyi: ‘Yehova chishi kuhasa nawa. Ngweche ngufwe kwami.’ Ni kuhonga cheswe, Eliya yapomba mushi lia mutondo.

Mungelo yamuhindwisa ni kumwamba ngwenyi: ‘Hinduka hanga ulie.’ Eliya yamona mbolo ya kwocha ni mulondo wa meya. Iye yalia, yanwa mba hi yapomba nawa. Mungelo yamuhindwisa nawa ni kumwamba ngwenyi: ‘Liako. Mumu unafupiwa kupwa ni tachi mu wenyi we.’ Chocho Eliya yalia nawa. Iye kalingile wenyi matangwa 40 ni ufuku 40, mba yaheta ku Mulundu wa Horepe. Koko, Eliya yanjila mu chivwenge hanga apombe. Alioze Yehova yahanjika nenyi. Iye yamwamba ngwenyi: ‘Eliya, yika unalingi kuno? Eliya yakumbulula ngwenyi: ‘A-Izalele hehuka chilakenyo chize alingile ni yena. Ayo hanapuzula yilumbilo ye ni kushiha aprofeta je. Haliapwila ayo kanafupu kungushiha.’

Yehova yamulweza ngwenyi: ‘Yako utwame ha mulundu.’ Chitangu, yimwe fuji yikolo yiyinjila mu chivwenge. Kusulaho, mavu yanyika nawa yikutuhuka kahia. Hi kusongo, Eliya yevwa limwe liji linahanjikile mushi. Iye yafuka kumeso ni chikuto chenyi nawa yatuhuka haze lia chivwenge. Chocho Yehova yamuhula mumu liaka te anachina. Eliya yakumbulula ngwenyi: ‘Ami wika nasala ukawami.’ Alioze Yehova yamulweza ngwenyi: ‘Ena kuushi ukawe. Mu Izalele muli atu 7,000 waze ananungu ni kunguwayila. Yako hanga utongole Elisha asalakane mu chihela che.’ Hohene, Eliya yaya ni kulinga yuma yize Yehova amulwezele. Shina wakufuliela ngwe Yehova makukwasa muze mulinga yize iye makutuma kulinga? Ewa, makukwasa. Tutalenu yuma yize yalingiwileko ha shimbu lia changa.