KUKWE JA TÖTIKARA 47
Jehovakwe ja di biani Elías ie
Nitre Baal kukwei niekä yebätä dre namani bare ye namani gare Jezabel ie angwane namani rubun krubäte. Aisete ni juani kwe kukwe mike gare Elías ie: ‘Nitre Baal kukwei niekä murie ketani ye kwrere jetebe mä murie ketai’. Kä jürä namani krubäte Eliabätä aune ngitiani kä ngwarbe nötare yekänti. Yete orabare kwe: ‘Jehová ti di ñaka nebera. Ti tönibi krütai jerekäbe’. Elías namani nainte krubäte aune nikani kübien kri täni.
Akwa ángel nämene Elías gainkrö aune ja kukwei mikani jäme kwe: ‘Näin krö, mröre’. Elías nikrabare ye ngwane, jä ngirebiti ban bolore nämene mikani aune ñö nämene jarrate. Mröbare kwe aune ñö ñani kwe biti namaninta kübien. Ángel niara ganinkröta aune niebare kwe ie: ‘Mröre. Ne kwe mä tädre dite nänkäre medente mäbike niken ye kokwäre’. Aisete Elías mröbare mada chi. Ye bitikäre nänbare kwe köbö 40 te rare aune dibire nememe ngutuä Horeb yekänti. Yete nikani kä mäkäte kübiakäre. Angwane Jehová blitabare ben: ‘¿Elías mätä dre nuainne nete?’. Elías niebare ie: ‘Nitre Israel kukwe käbämikani mäi ye niaratre ñaka tä mike täte. Kä jondron kukwakäre mä kräke ye niaratre dikaninte aune nitre mä kukwei niekä ye murie ketani kwetre. Aune nengwane niaratre tö ti murie ketai arato’.
Jehová niebare Elías ie: ‘Jakwre aune mä raba nünaninkä ngutuäbiti’. Angwane murie dite mata nükani, dobo kri nakaninkä aune ye bitikäre ñukwä jutra namani kri krubäte. Mrä mada, ni kukwei tiebe aune jäme juruabare Elías ie. Aisete dän kwe yebiti ja ngwäre jue mikani kwe aune namani nünaninkä jubäre kä mäkä ye ken. Ñobätä niara nämene ngitie ye Jehová ngwantaribare ie. Aune Elías niebare ie: ‘Ti mä kukwei niekä aibe nebera’. Akwa Jehová niebare ie: ‘Mä ñaka tä kaibe. Nitre 7,000 täbe ti mike täte Israel. Nän aune mä nie Eliseo ie tikwe niara dianinkä ne kwe rabadre ti kukwei niekä mä bitikäre’. Jehovakwe dre nuain manabare Elías ie ye nikani nuainne jötrö ngwarbe. ¿Mäkwe Jehová mikai täte angwane niarakwe mä dimikai arato raba ruin mäi? Jän mä dimikai kwe. Kä nämene moren krubäte ye ngwane dre namani bare ye ani mike gare jai.
“Aisete munkwe ñan töbika ngwarbe dikaro, akwa munkwe blita Ngöböbe jakrä amne, kukwe jökrä mike gare ie munkwe amne, ja di käräre kwärä munkwe kuin nie Ngöböye arato” (Filipenses 4:6).
Ne rabai tuen kwin mäi arato
MÄKWE MONSOTRE MÄKWE TÖTIKA
¿Ja tärä nemen ruin kaibe mäi?
Ja namani ruin kaibe Elías ie ye ngwane, ¿Jehovakwe dimikani ño? ¿Kukwe namani bare Elías yebätä ye tä dre driere ja töi kräke nie?
MÄKWE TÖDEKA NIARATRE ERERE
Elías: Ngöbökwe niara kriemikani aune töi mikani jäme
¿Kukwe meden käkwe Elías mikani ulire krubäte, abokänbatä tö namani gatai?
