Isebel wa zuva ohunga noviṋa mbya tjitwa kovaprofete vaBaal nu wa pindikire tjinene. Eye wa hinda ombuze ku Elia na tja: ‘Muhuka ove mo ṱu tjimuna ovaprofete vaBaal mbo.’ Elia wa uta okutira na tupuka aka ṱara mokuti onguza. Eye wa kumba ku Jehova na tja: ‘Jehova, hi nokuyenena okutjinda otjiṋa hi rukwao. Ndje sa mbi ṱokukoka uriri.’ Mena rokutja wa urirwe tjinene Elia wa karara kehi yomuti.

Omuengeli wa pendura Elia nemu raere neraka etarazu kutja, ‘Penduka u rye.’ Elia wa muna omboroto ombyu komawe notjitjuma tjomeva. Eye wa rya nu anu okuzambo a rara rukwao. Omuengeli we mu pendura rukwao na tja: ‘Ryaa. Mo hepa omasa kouyenda mbwe ku kuramene.’ Okutja Elia wa rya rukwao. Okuzambo wa kayenda oure womayuva 40 nomauṱuku 40, nga tja vaza kOndundu Horeb. Elia wa hita mondimba na karara. Nu Jehova wa hungira kuna ye na tja: ‘Mo ungura tjike mba Elia?’ Elia wa zira na tja: ‘Ovaisrael va teya omakwizikiro ngu va tjita kove. Owo va teya ovipunguhiro vyoye nave zepa ovaprofete voye. Nambano mave vanga okundjizepa.’

Jehova wa tja ku ye: ‘Kakurame pondundu.’ Rutenga pa vinga otjivepo otjinamasa potjinyo tjondimba. Okuzambo pa tjitwa omanyinganyingiro wehi na pe yakura omuriro. Korusenina Elia wa zuva eraka etarazu nde mu hungirisa. Eye we rikutjira omurungu we nombanda ye yokombanda na kurama pendje yondimba. Okuzambo Jehova we mu pura kutja ongwaye tja taura. Elia wa tja: ‘Owami uriri ngu mba sewa po.’ Posiya Jehova we mu raera kutja, ‘Kaove erike. Ku novandu 7 000 moIsrael mbe rikotamena ku ami. Twende u kazike Elisa otjomuprofete moruveze rwoye.’ Tjimanga Elia wa ya na katjita otja Jehova pe mu raera. Ove wina u muna kutja Jehova me ku vatera tji wa tjiti atjihe tji me ku ningire okutjita po? Ii, me ku vatere. Ngatu tare kutja ovikeṋa mbya tjitwa moruveze rwourumbu.