LEKSION 47
Pinapigsa ni Jehova ni Elias
Naammuan ni Jezebel ti napasamak kadagiti propeta ni Baal, ket permi ti ungetna. Nangibaon iti mensahero a mangibaga ken Elias: ‘Inton bigat, mataykanto a kas kadagiti propeta ni Baal.’ Kasta unay ti buteng ni Elias ket nagtartaray a napan iti desierto. Inkararagna: ‘Jehova, diakon kabaelan. Bay-annak lattan a matay.’ Nakaturog ni Elias iti sirok ti kayo gapu iti bannogna.
Riniing isuna ti maysa nga anghel ket naalumamay nga imbagana: ‘Bumangonka ket manganka.’ Nakakita ni Elias iti sangapitser a danum ken iti tinapay iti rabaw dagiti napudot a bato. Nangan ken imminum sa naturog manen. Riniing manen ti anghel ket imbagana: ‘Manganka tapno adda pamigsam a magna iti adayo.’ Isu a nangan manen ni Elias. Kalpasanna, nagnagna ni Elias iti 40 nga aldaw ken 40 a rabii agingga a nakadanon iti Bantay Horeb. Simrek ni Elias iti maysa a kueba tapno maturog. Ngem nakisarita ni Jehova kenkuana. Imbagana: ‘Ania ti ar-aramidem ditoy, Elias?’ Insungbat ni Elias: ‘Saan a tinungpal dagiti Israelita ti karida kenka. Dinadaelda dagiti altarmo ken pinatayda dagiti propetam. Ita, kayatdak met a patayen.’
Imbaga ni Jehova kenkuana: ‘Rummuarka ket agtakderka iti bantay.’ Nagangin iti nakapigpigsa iti ruar ti kueba. Idi kuan, nagginggined, sa adda apuy. Kalpasanna, nakangngeg ni Elias iti naalumamay ken nakapsut a boses. Inyabbongna ti badona iti rupana ket nagtakder iti ruar ti kueba. Dinamag ni Jehova kenkuana no apay a naglibas. Kinuna ni Elias: ‘Siak laengen ti nabati.’ Ngem imbaga ni Jehova: ‘Saanka nga agmaymaysa. Adda pay 7,000 a tattao iti Israel nga agdaydayaw kaniak. Mapanka ket dutokam ni Eliseo kas propeta a kasukatmo.’ Dagus nga inaramid ni Elias ti imbaga ni Jehova. Panagkunam, tulongannaka met ngata ni Jehova no aramidem ti ipapaaramidna? Wen. Kitaenta ita ti maysa a pasamak bayat ti tikag.
“Dikay madanagan iti aniaman, no di ket ipakaammoyo koma iti Dios ti amin a kiddawyo babaen ti kararag ken araraw, agraman panagyaman.”—Filipos 4:6