Yezebela gaw Bala myihtoi ni sat kau hkrum ai lam na ai shaloi, grai masin pawt mat ai. Dai majaw, Elia hpang de ndai hku shiga sa dat ai: ‘Hpawt ni, nang mung Bala myihtoi ni zawn si ra na re.’ Elia gaw grai hkrit kajawng nna, nam mali de hprawng mat wa ai. Elia ndai hku akyu hpyi ai: ‘Yehowa e, ngai n lu hkam sharang sai. Ngai si mayu sai.’ Elia gaw grai ba nna, hpun npu kaw yup pyaw mat ai.

Lamu kasa gaw shi hpe sa jasu nna, angwi sha ndai hku tsun ai: ‘Rawt nna sha u.’ Elia gaw kahtet ai nlung ntsa mara da ai muk tawng hte hka bu hpe mu ai. Shi gaw lu la sha la nna, kalang bai yup pyaw mat ai. Lamu kasa mung shi hpe kalang bai jasu la nna ndai hku tsun ai: ‘Sha u. Na a hkrun lam a matu n-gun rawng ra ai.’ Dai majaw, Elia mung kalang bai sha dat ai. Dai hpang, shi gaw shani shana nhtoi 40 ya tup, Horeb Bum de du hkra bu hkawm sa ai. Dai Bum de du yang, Elia gaw lungpu kata shang nna yup hkring sa la ai. Dai shaloi, Yehowa gaw shi hpe ndai hku ga shaga ai: ‘Elia, nang ndai kaw hpa galaw taw nga ai kun?’ Elia ndai hku bai tsun ai: ‘Israela ni gaw, nang hte tawn da ai ga shaka ni hpe kau da sai. Na a tawn hkungri ni hpe sharun kau nna, na a myihtoi ni hpe mung, sat kau sai. Ya, ngai hpe mung sat na matu shakut nga ai.’

Yehowa shi hpe ndai hku tsun ai: ‘Pru wa rit. Dai bum ntsa kaw tsap nga u.’ Shawng nnan, Elia tsap nga ai lungpu hpe grai ja ai nbung laru ru mat ai. Dai hpang, nnang nawn nawn wa nna wan grung wa ai. Hpang jahtum, Elia gaw angwi sha nga ai nsen hpe na dat ai. Dai shaloi, shi a palawng hte shi a myi man hpe magap dat nna, lungpu shinggan de pru nna sa tsap ai. Hpa majaw hprawng hkawm ai lam shi hpe Yehowa san ai. Elia ndai hku tsun ai: ‘Nang hpe nawku ai ngai chyu sha ngam sai.’ Yehowa ndai hku bai tsun ai: ‘Nang hkrai sha n re. Israela ni kaw nna, ngai hpe nawku dawjau nga ai marai 7,000 naw ngam ai. Elisha hpang sa nna, na a myihtoi shara hta na a malai myihtoi galaw na matu aya tang dat u.’ Elia mung Yehowa tsun ai hte maren, kalang ta sa mat wa ai. Yehowa galaw shangun ai hpe galaw yang, shi anhte hpe karum ya na kun? Karum ya na re. Jan gri ai laman, hpa byin wa ai hpe anhte yu yu ga.