Li xJezabel kixnaw li keʼxkʼul ebʼ li xpropeet laj Baal ut jwal kijosqʼoʼk. Joʼkan naq, kixtaqla jun laj kʼehol esil re xyeebʼal re laj Elias: «Wulaj kamenaqat chik, joʼ keʼxkʼul ebʼ li xpropeet laj Baal». Kʼajoʼ naq kixuwak laj Elias ut kiʼelelik saʼ chaqichʼochʼ. Aran kitijok: «At Jehobʼa, inkʼaʼ chik ninkuy. Nawaj kamk». Laj Elias jwal lubʼlu chaq ut kikubʼeek xwara rubʼel jun li cheʼ.

Abʼan, jun li anjel kirajsi laj Elias ut kixye re saʼ qʼunil kuxej: «Waklin ut waʼin». Laj Elias kiril jun li wa saʼ xbʼeen li tiqwal pek ut jun xaar chi haʼ. Kiwaʼak ut kiʼukʼaʼk, ut xwark wiʼ chik. Li anjel kirajsi wiʼ chik ut kixye re: «Waʼin. Aajel ru naq wanq aametzʼew re naq tatruuq chi xik». Joʼkan naq, laj Elias kiwaʼak bʼayaq chik. Chirix chik aʼan, kibʼeek chiru 40 kutan ut 40 qʼoqyink toj reetal kiwulak saʼ li tzuul Horeb. Aran kiʼok chi wark saʼ jun li ochoch pek. Tojaʼ naq, kiʼaatinaak xbʼaan li Jehobʼa: «Kʼaru yookat arin, Elias?». Laj Elias kixye re: «Ebʼ laj Israel inkʼaʼ keʼxbʼaanu li keʼxyeechiʼi aawe. Keʼxjukʼ ebʼ laaʼaltar ut keʼxkamsi ebʼ laapropeet. Ut anaqwan teʼraj ajwiʼ inkamsinkil».

Li Jehobʼa kixye re laj Elias: «Elen ut kanaqat chi xaqxo saʼ li tzuul». Tojaʼ naq, kichalk jun li kawil iqʼ, jun li hiik ut, chirix chik aʼan, jun li xaml. Saʼ raqik, laj Elias kirabʼi jun qʼunil xyaabʼ kuxej. Joʼkan naq, kixtzʼap li xnaqʼru rikʼin li raqʼ ut kikanaak chi xaqxo chiru li ochoch pek. Li Jehobʼa kixpatzʼ re kʼaʼut naq xʼelelik. Ut laj Elias kixye re: «Kaʼaj chik laaʼin xinkanaak choʼq propeet». Abʼan li Jehobʼa kixye re: «Moko wankat ta aajunes. Toj wank 7.000 saʼ Israel li nekeʼxloqʼoni wu. Ayu ut ye chaq re laj Eliseo naq aʼan sikʼbʼil ru re naq tkanaaq choʼq propeet chaawix laaʼat». Laj Elias saʼ junpaat xkoho xbʼaanunkil li kitaqlaak wiʼ xbʼaan li Jehobʼa. Ma tatxtenqʼa ajwiʼ li Jehobʼa wi tat-abʼinq chiru? Heeheʼ, tatxtenqʼa. Anaqwan tqil kʼaru xkʼulmank saʼ xqʼehil li chaqiʼe.