Jezebeli nĩ aaiguire ũrĩa gwathiĩte ũhoro-inĩ wĩgiĩ anabii a Baali, na aakĩrakara mũno. Aatũmĩire Elija ndũmĩrĩri ĩno: ‘Rũciũ ũgaakorũo ũrĩ mũkuũ o ta anabii acio a Baali.’ Elija nĩ aamakire mũno nginya akĩũrĩra werũ-inĩ. Aahoire ũũ: ‘Jehova, ndingĩhota gũkirĩrĩria rĩngĩ. Reke ngue.’ Tondũ Elija aarĩ mũnogu mũno, nĩ aakomire rungu rwa mũtĩ.

Mũraika wa Jehova nĩ aamũkĩririe na akĩmwĩra ũũ: ‘Ũkĩra ũrĩe.’ Elija nĩ onire mũgate ũhĩhĩirio makara igũrũ na mbũthũ ya maĩ. Aarĩire na akĩnyua, agĩcoka agĩkoma rĩngĩ. Mũraika nĩ aamũũkĩririe rĩngĩ na akĩmwĩra: ‘Rĩa tondũ nĩ ũrabatara hinya nĩ ũndũ wa thabarĩ ĩrĩa ĩrĩ mbere yaku.’ Kwoguo Elija akĩrĩa rĩngĩ. Aacokire agĩthiĩ thabarĩ ya thikũ 40 ũtukũ na mũthenya nginya agĩkinya Kĩrĩma-inĩ kĩa Horebu. Akinya kũu, nĩ aaingĩrire ngurunga-inĩ na agĩkoma. No Jehova nĩ aaririe nake na akĩmũũria: ‘Elija, nĩ kĩĩ ũreka haha?’ Nake akĩmũcokeria: ‘Aisiraeli nĩ matigĩte kũrũmĩrĩra kĩrĩkanĩro gĩaku. Nĩ mathũkangĩtie kĩgongona gĩaku na makoraga anabii aku. Na rĩu nĩ niĩ maretha nĩguo manjũrage.’

Jehova aamwĩrire ũũ: ‘Ta uma na ũthiĩ ũrũgame kĩrĩma igũrũ.’ Kwambire gũkĩgĩa rũhuho rwarĩ na hinya hau ngurunga-inĩ. Gũgĩcoka gũkĩgĩa na gĩthingithia na mwaki. Thutha ũcio, Elija akĩigua kamũgambo gaceke kahoreru. Eehumbĩrire ũthiũ na kagooti gake na akiuma ngurunga. Jehova nĩ aacokire akĩmũũria kĩrĩa gĩatũmĩte ore. Elija aamũcokeirie ũũ: ‘No niĩ wiki ndigarĩte.’ No Jehova akĩmwĩra: ‘Ndũrĩ wiki. Kũrĩ na andũ angĩ 7,000 thĩinĩ wa Isiraeli marandungatĩra. Thiĩ wamũre Elisha atuĩke mũnabii handũ-inĩ haku.’ Elija nĩ aathiire o rĩo na agĩka ũrĩa eerĩtwo nĩ Jehova. Hihi nĩ ũkuona ta Jehova arĩgũteithagia weka ũrĩa arenda? Ĩĩ, nĩ arĩgũteithagia. Reke tũcoke thutha hanini mahinda marĩa Isiraeli kwarĩ na ng’aragu na tuone ũndũ wekĩkire hĩndĩ ĩyo.