Isebel okwa li a uda e shi sha ningilwa ovaprofeti vaBaal, nokwa li a handuka unene. Okwa li a tuma etumwalaka kuElia tali ti: ‘Mongula oto ka fya ngaashi naanaa ovaprofeti vaBaal.’ Elia okwa li a tila unene ndele ta faduka po a yuka kombuwa. Okwa ilikana ta ti: ‘Jehova, itandi dulu vali, osha wana. Efe nge ndi fye.’ Molwaashi Elia okwa li a loloka, okwa kofela koshi yomuti.

Omweengeli okwa li e mu pendula, ndele ta popi naye newi litalala ta ti: ‘Penduka u lye.’ Elia okwa li a mona omungome wa telekwa komamanya mapyu noshiyuma shomeva. Okwa lya ndele ta nu, ndele ta kofa vali. Omweengeli okwa li e mu pendula vali ndele ta ti: ‘Lya, owa pumbwa eenghono domondjila.’ Opo nee Elia okwa lya vali. Okudja opo, okwa enda omafiku 40, oufiku nomutenya, fiyo a fika komhunda yaHoreb. Elia okwa li a ya mekololo a ka kofe. Ashike Jehova okwa li a popya naye a ti: ‘Elia, oto ningi shike apa?’ Okwa nyamukula ta ti: ‘Ovaisrael inava wanifa po eshi ve ku udanekela. Ova hanauna po oaltari yoye nokudipaa ovaprofeti voye. Paife aame va hala okudipaa.’

Jehova okwa tya kuye: ‘Inda ndele to kala ofika komhunda.’ Tete okwa li kwa dja omhepo inene tai piti mekololo. Opo nee okwa dja ekakamo ledu nomundilo. Hauxuuninwa, Elia okwa li a uda ondaka i li pedu noya ngungumana, ndele te liuvike oshikutu shaye komutwe nokukala ofika pondje yekololo. Opo nee Jehova okwe mu pula kutya omolwashike a faduka po. Elia okwa nyamukula a ti: ‘Aame andike nda xupa po.’ Jehova okwe mu lombwela a ti: ‘Haave auke. Ope na ovanhu 7 000 muIsrael ovo natango hava longele nge. Inda ndele to ka nangeka po Elisa a ninge omuprofeti ponhele yoye.’ Diva, Elia okwa li a ya ndele ta ningi ngaashi Jehova e mu lombwela. Mbela naave Jehova ote ke ku kwafela ngoo ngeenge oto dulika kwaasho te ku lombwele? Heeno. Natu ka taleni osho sha li sha ningwa po pefimbo loshikukuta.