တၢ်မၤလိ ၄၇
ယဟိဝၤယွၤဒုးဆူၣ်ထီၣ် ဝံအ့ၤလံယၤအဂံၢ်အဘါ
နီၢ်အံၤစ့ဘ့ၤလးနၢ်ဟူဝဲလၢ ဘဧၤလးအဝံတဖၣ်သံဝဲအဃိ အဝဲသးပှံၢ်ထီၣ်တၢ်ဒိၣ်မးလီၤ. အဃိ နီၢ်အံၤစ့ဘ့ၤလးဆှၢလီၤဝဲ တၢ်ကစီၣ်လၢဝံအ့ၤလံယၤအအိၣ်လၢ– ‘ဒ်ဘဧၤလးအဝံတဖၣ်သံဝဲအသိး ခဲမုၢ်ဆ့ၣ်န့ၣ် နကသံလီၤ.’ ဝံအ့ၤလံယၤပျံၤတၢ်ဒိၣ်မးအဃိ အဝဲလဲၤဃ့ၢ်အိၣ်ဝဲလၢ ပှၢ်မုၢ်ကနၢအပူၤလီၤ. ဝံအ့ၤလံယၤဃ့ဘါထုတဖၣ်ဝဲလၢ– ‘ယဟိဝၤယွၤဧၢ, ယတူၢ်တပှဲၤလၢၤဘၣ်. ယအဲၣ်ဒိးသံလံ.’ ခီဖျိလၢ ဝံအ့ၤလံယၤ လီၤဘှံးလီၤတီၤဒိၣ်မးအဃိ အဝဲမံဘၣ်အသးလၢ သ့ၣ်တထူၣ်အခီၣ်ထံးလီၤ.
မူခိၣ်ကလူးတဂၤ ဟဲကိးပၢၢ်ထီၣ်ဝံအ့ၤလံယၤ ဒီးတဲဘၣ်အီၤလၢ အကလုၢ်ကပုာ်လုးလၢ– ‘ဆၢထၢၣ်အီၣ်တၢ်တက့ၢ်.’ ဝံအ့ၤလံယၤထံၣ်ဝဲ ကိၣ်လၢအကိၢ်ကိၢ်လၢၤလၢၤဒီးထံအီဒၢတဖျၢၣ်လီၤ. ဝံအ့ၤလံယၤအီၣ်တၢ်ဒီးအီတၢ်ဝံၤဒီး က့ၤမံကဒါက့ၤဝဲလီၤ. မူခိၣ်ကလူးကိးပၢၢ်ထီၣ်ကဒီးအီၤ ဒီးတဲဘၣ်အီၤလၢ– ‘အီၣ်တၢ်သၢၣ်. နလိၣ်ဘၣ်တၢ်ဂံၢ်တၢ်ဘါလၢ နတၢ်လဲၤတၢ်က့ၤအဂီၢ်လီၤ.’ လၢတၢ်န့ၣ်အဃိ ဝံအ့ၤလံယၤပၢၢ်ထီၣ် ကဒီး ဒီးအီၣ်တၢ်ဒီးအီတၢ်လီၤ. ဝံၤဒီး ဝံအ့ၤလံယၤလဲၤတၢ်အနံၤ ၄၀ ဒီး အနၤ ၄၀ တုၤလီၤလၢကစၢၢ်ဃိၤရ့းလီၤ. ဖဲန့ၣ်န့ၣ် ဝံအ့ၤလံယၤလဲၤမံဝဲလၢ လ့ပူၤလီၤ. ဘၣ်ဆၣ် ယဟိဝၤယွၤတဲဘၣ်အီၤလၢ– ‘ဝံအ့ၤလံယၤဧၢ, နဟဲမၤတၢ်မနုၤဖဲအံၤလဲၣ်,’ ဝံအ့ၤလံယၤတဲဆၢက့ၤဝဲလၢ– ‘ပှၤအံၣ်စရ့လးဖိတဖၣ်တတီဒီး အတၢ်အၢၣ်လီၤအီလီၤဒီးနၤလၢၤဘၣ်. အဝဲသ့ၣ်မၤဟးဂီၤကွံာ် နတၢ်လုၢ်ထီၣ်တၢ်အလီၢ် ဒီးမၤသံကွံာ် နဝံတဖၣ်လီၤ. ခဲအံၤ အဝဲသ့ၣ်ဂုာ်ကျဲးစၢး မၤသံယၤစ့ၢ်ကီးလီၤ.’
ယဟိဝၤယွၤတဲဘၣ် ဝံအ့ၤလံယၤလၢ– ‘လဲၤဂဲၤဆၢထၢၣ်လၢ ကစၢၢ်လိၤတက့ၢ်.’ အဆိကတၢၢ်န့ၣ် ဝံအ့ၤလံယၤထံၣ်ဘၣ်ဝဲ ကလံၤမုၢ်ဖးဒိၣ်ဟဲအူထီၣ်ဝဲလီၤ. ဝံၤဒီး ဟီၣ်ခိၣ်ဟူးဝးထီၣ်ဝဲဆူၣ်ဆူၣ်ဒီးမ့ၣ်အူ ဟဲဖျိးထီၣ်ဝဲ ဒီဒူၣ်ဒီထၢလီၤ. လၢခံန့ၣ် ဝံအ့ၤလံယၤနၢ်ဟူဝဲ တၢ်ကလုၢ်ကဖီလီတခါလီၤ. ဝံအ့ၤလံယၤကးဘၢအမဲာ်လၢ အဆ့ကၤဒီးလဲၤဆၢထၢၣ်ဝဲလၢ လ့ကအိအချၢလီၤ. ဝံၤဒီး ယဟိဝၤယွၤသံကွၢ်အီၤလၢ ဘၣ်မနုၤအဃိ အဝဲဘၣ်ဃ့ၢ်ကွံာ်ဝဲလဲၣ်န့ၣ်လီၤ. ဝံအ့ၤလံယၤတဲဆၢက့ၤယဟိဝၤယွၤလၢ– ‘ပှၤလၢ အဘူၣ်ထီၣ်ဘါထီၣ်နၤန့ၣ် အိၣ်တ့ၢ်ထဲယၤတဂၤဧိၤလီၤ.’ ဘၣ်ဆၣ် ယဟိဝၤယွၤတဲဘၣ်အီၤလၢ– ‘ပှၤလၢအဘူၣ်ထီၣ်ဘါထီၣ်ယၤန့ၣ် တအိၣ်တ့ၢ်ထဲနၤတဂၤဧိၤဘၣ်. ပှၤလၢကီၢ်အံၣ်စရ့လးအပူၤ လၢအဘူၣ်ထီၣ်ဘါထီၣ်ယၤန့ၣ် အိၣ်ဒံးဝဲအဂၤ ၇,၀၀၀ လီၤ. က့ၤဃုထၢထီၣ် စီၤအလံၤၡါလၢ ကကဲထီၣ်ဝံလၢနလီၢ်န့ၣ်တက့ၢ်.’ တဘျီဃီန့ၣ် ဝံအ့ၤလံယၤက့ၤဝဲဒီးမၤထွဲဝဲ ဒ်ယဟိဝၤယွၤမၢအီၤအသိးန့ၣ်လီၤ. နမ့ၢ်မၤတၢ်လၢ ယဟိဝၤယွၤမၢနမၤန့ၣ် နဆိကမိၣ်လၢ ယဟိဝၤယွၤကမၤစၢၤနၤစ့ၢ်ကီးဧါ. ယဟိဝၤယွၤကမၤစၢၤနၤလီၤ. ခဲအံၤ ပကဃုသ့ၣ်ညါအါထီၣ် တၢ်မနုၤမၤအသး ဖဲတၢ်ယီၤဃ့အိၣ်ထီၣ်ဝဲ အဆၢကတီၢ်လဲၣ်.
“သုတဘၣ်ယိၣ်တၢ်နီတမံၤတဂ့ၤ. မ့မ့ၢ်လၢတၢ်ကိးမံၤဒဲးန့ၣ် လၢတၢ်ထုကဖၣ်, ဒီးလၢတၢ်ဃ့ကညးအိၣ်ဒီး တၢ်စံးထီၣ်ပတြၢၤတၢ်အဘျုးအဖှိၣ်အပူၤန့ၣ်, ဘိးဘၣ်သ့ၣ်ညါယွၤလၢ သုတၢ်အဲၣ်ဒိးတဖၣ်န့ၣ်တက့ၢ်.”—ဖံလံးပံၤ ၄:၆