Baˍlaˆ ve tcuh kaˍ paˍ suh peuˬ tehꞈ jawˇ mawˇ ma Yeˍsaˍbeˍlaˆ gʼa kaˇ htaˇ, yawˇ nyi ma zuhˆ jaˇ ve yoˬ. Yawˇ chaw htaꞈ hpehˇ peu leh Eˇliˇyaꞈ htaꞈ ca kʼoˆ piˇ tcuh ve, ‘shawˉ pawˍ kʼo, Baˍlaˆ ve tcuh kaˍ paˍ hkʼa shuˍ nawˬ gʼa suh tuˬ yoˬ.’ Eˇliˇyaꞈ kawˆ jaˇ leh heh puiˉ hkʼaw lo hpaw˗e leh yawˇ bon lawˬ leh kʼoˆ ve, ‘Yaˬhoˉvaˬ˗oˬ, ngaˬ yeunˇ hkanˍ maˇ gʼaˇ˗o. Ngaˬ htaꞈ suh˗e tcuh laˇ˗oˆ.’ Oˇ ve hkʼawꞈ nawˉ, yawˇ heuˬ jaˇ ve pa taw, suhˆ buiˇ hawˉ lo paˍ zuhꞈ leh zuhꞈ muiˉ kʼa sheˬ ve yoˬ.

Mvuhˇ naw ma tcuh yaˇ yawˇ htaꞈ nawˍ piˇ leh kʼoˆ ve, ‘tu loˬ. Caˇ tuˬ caˇ˗oˆ.’ Eˇliˇyaꞈ haˉ pui shiˍ hkʼoˆ hkaoˍ monˇ teˇ diˬ leh iˉ kaˆ teˇ kawˆ teh taˍ ve htaꞈ gʼa mawˬ ve yoˬ. Yawˇ caˇ peuˬ dawˬ peuˬ hkʼawꞈ nawˉ, kʼawꞈ zuhꞈ˗e ve yoˬ. Mvuhˇ naw ma tcuh yaˇ yawˇ htaꞈ kʼawꞈ nawˍ piˇ leh kʼoˆ ve, ‘caˇ tuˬ kʼawꞈ caˇ˗oˆ. Awˬ gʼaˇ cawˬ la piˇ. Awˬ lawn kʼo, nawˬ kʼai tuˬ ve yaꞈ kʼaw vuiˇ jaˇ sheˍ.’ Eˇliˇyaꞈ kʼawꞈ caˇ peuˬ hkʼawꞈ nawˉ, 40 nyi 40 haˉ yaꞈ kʼaw juˇ leh Siˉnaˆ hkʼaw lo gaˬ la ve yoˬ. Eˇliˇyaꞈ haˉ kʼoˍ hkʼaw ca zuhꞈ taˍ ve yoˬ. Yaꞈ hkʼaˇ, Yaˬhoˉvaˬ yawˇ htaꞈ kʼoˆ piˇ ve, ‘Eˇliˇyaꞈ˗oˬ, nawˬ choˬ kaˬ lo aˬ htoꞈ ma te chehˇ ve le?’ Eˇliˇyaꞈ hkʼawꞈ piˇ ve, ‘Iˉsaˍreˍlaˆ chaw nawˬ htaꞈ baˬ taˉ peuˬ. Yawˇ hui nawˬ ve tuˉ tanˇ kuiˬ htaꞈ te luˬ leh, nawˬ ve tcuh kaˍ paˍ htaꞈ tiˇ pehˍ peuˬ. Ngaˬ htaꞈ kaꞈ yawˇ hui tiˇ pehˍ gaˇ chehˇ ve yoˬ.’

Yaˬhoˉvaˬ Eˇliˇyaꞈ htaꞈ kʼoˆ piˇ ve, ‘hkʼaw hkʼoˆ lo ca huˉ taˍ˗oꞈ.’ Mvuhˇ haw lonˉ meuˆ laˬ peuˬ hkʼawꞈ nawˉ, miˬ hiˆ la leh aˬ miˍ toꞈ tawˆ la ve yoˬ. Oˇ htaˇ, Eˇliˇyaꞈ awˬ hkawˇ nuˇ lehˍ gʼa kaˇ ve teˇ yanˇ, yawˇ ve mehˆ hpfuhˇ htaꞈ aˉ poꞈ yuˬ beh leh haˉ kʼoˍ hkʼaw tawˆ la ve yoˬ. Yaˬhoˉvaˬ na piˇ ve, aˬ htoꞈ ma te hpaw la ve le? Yawˇ hkʼawꞈ piˇ ve, ‘chi teˇ hkui ngaˬ teˇ gʼaˇ ceh tiˉ cawˬ taˉ ve yoˬ.’ Yaꞈ hkʼaˇ, Yaˬhoˉvaˬ kʼoˆ piˇ ve, ‘nawˬ teˇ gʼaˇ ceh tiˉ maˇ heˆ. Iˉsaˍreˍlaˆ chaw hkʼaw ngaˬ htaꞈ oˉ kʼoˍ pui chehˇ ve 7,000 gʼaˇ cawˬ sheˍ. Kʼoꞈ˗e loˬ. Nawˬ awˬ tan tcuh kaˍ paˍ te tuˬ Eˇliˇshehˇ htaꞈ leuˆ yuˬ˗o.’ Eˇliˇyaꞈ Yaˬhoˉvaˬ kʼoˆ ve hkʼe laꞈ haˉ te ve yoˬ. Yaˬhoˉvaˬ kʼoˆ ve hkʼe nawˬ te ve kʼo, Eˇliˇyaꞈ htaꞈ ga piˇ ve hkʼa shuˍ nawˬ htaꞈ ga laˇ tuˬ laˇ? Ga laˇ tuˬ yoˬ! Chi teˇ hkui mvuhˇ miˬ goˇ choˆ jaˇ ve htaꞈ kʼawꞈ dawˇ nyi sheˍ.