Ka ne Jezebel owinjo gima notimore ne jonabi mag Baal, iye ne owang’ marach. Ne ooro ne Elija wach niya: ‘Kiny initho mana kaka jonabi mag Baal.’ Luoro ne omako Elija mi oringo mopondo e thim. Nolemo kokwayo Jehova kama: ‘Aol. Weya atho.’ Kae to nindo matut notere e tie yien.

Malaika moro ne ochiewe ka nyise e yo mamuol niya: ‘Chung ichiem.’ Elija nochung’ moneno makate e wi kidi maliet kod jag ma nigi pi. Nochiemo, nomodho, kae to nodok e nindo. Malaikano nochiewe kendo, monyise niya: ‘Chiem, mondo iyud teko mar wuoth. Elija nochiemo kendo. Kae to ne owuotho kuom ndalo 40 odiechieng’ gi otieno mochopo e Got Horeb. Ka ne en kuno, nodonjo e i rogo moro kata bur ma ne nie kor lwanda, mondo onindi. To Jehova nowuoyo kode ka penje kama: ‘Elija, ang’o mitimo kae?’ Elija nodwoke ni: ‘Jo-Israel oseketho singruok ma ne gitimo kodi. Giseketho kendo mag misango. Bende, gisenego jonabini. Sani koro gidwaro nega.’

Jehova nonyise ni: ‘Dhi ichung’ e got kacha.’ Ka nosetimo kamano, yamo mager ne okudho ka kalo. Bang’ mano, piny ne oyiengni, kendo mach nonenore. Kae to Elija nowinjo dwol moro mang’won ma wuoyo mos. Elija ne oumo wang’e gi bath koti ma norwako, mi ochung’ e dho rogo. Kae to Jehova nopenje gimomiyo ne oringo. Elija nodwoko ni: ‘An kenda e ma adong’.’ To Jehova nonyise ni: ‘Ok in kendi. Nitie Jo-Israel mamoko 7,000 ma pod lama. Dhi iwal Elisha mondo obi obed janabi bang’i.’ Elija ne odhi mapiyo, mi otimo kaka Jehova ne onyise. Be iparo ni in be Jehova biro jiwi ka itimo gik ma odwaro ni itim? Ee, obiro timo kamano. We wane ane gimoro ma notimore e kinde oro ma ne wasewuoye motelocha.