Ok tbʼiʼn Jezabel aju otoq bʼaj kyiʼj tsanjel Baal ex tzaj nim tqʼoj tuʼn jlu. Tuʼntzunju, xi tsamaʼn jun xjal qʼamal jlu te Elías: «Nchiʼj otoq kyima ik tzeʼn qe tsanjel Baal». Tzaj nim t-xobʼil Elías ex xi oq toj tzqij txʼotxʼ. Tej tpon atztzun, ok ten naʼl Dios kyjalu: «Jehová, ya mlay tzikʼx mas wuʼne. Waje tuʼn nkyime». Nim otoq sikt Elías ex ikʼ jtan tjaqʼ jun tzeʼ.

Pontzun jun anjel kʼasilte Elías ex chebʼe xi tqʼamaʼn jlu te: «Weʼktza ex waʼna». Ok tqʼoʼn Elías twitz tiʼj jun pan tzqʼajsaʼn maj tibʼaj jun abʼj kyaq taʼ tukʼix jun xar aʼ. Bʼajtzun waʼn Elías ex bʼaj kʼaʼn, ex ikʼ jtan juntl maj. Jaw tkʼasin anjel juntl maj ex xi tqʼamaʼn te: «Waʼna. Il tiʼj tuʼn tten tipuna tuʼn t-xiʼya toj jun tbʼeya». Xitzun twaʼn Elías chʼintl twa. Yajxitl, bʼet 40 qʼij ex 40 qonikʼen tejxi tpon twi witz Horeb. Atztzun, okx jtal toj jun jul. Tzajtzun yolin Jehová tukʼil ex tqʼama te: «¿Ti in bʼaj teya tzalu, Elías?». Xitzun ttzaqʼweʼn Elías te Jehová: «Mintiʼ in japun twi kyyol aj Israel xi kytziyen teya. Ma kubʼ kyxiten qe t-altara ex ma kubʼ kybʼyoʼn qe tsanjela. Atzun jaʼlo, kyaj tuʼn nkyime».

Xitzun tqʼamaʼn Jehová te Elías: «Tetza ex weʼkuya twi witz». Tzajtzun jun nintz kyqʼiqʼ ex jun kyaqnajnabʼ, ax ikx tzaj jumin qʼaqʼ. Tejtzun tbʼaj, xi tbʼiʼn Elías jun tqʼajqʼajel wibʼaj chebʼe tzaj qʼajt. Oktzun tmaqsiʼn twitz tuʼn t-xbʼalun ex ax kyaj weʼ tiʼjxi jul. Xi tqanin Jehová te tiquʼn otoq tzʼel oq. Xi ttzaqʼweʼn Elías te: «Njunalxe ma chin kyaj tene te aj sanjel». Atzunte Jehová xi tqʼamaʼn te: «Nya tjunalxa ata. Kukx ateʼ 7,000 xjal in che kʼulin weye toj tnam Israel. Txiʼya ex qʼamanxa te Eliseo qa a ma jaw njyoʼne tuʼn tok te aj sanjel te t-xela». Xitzun Elías bʼinchalte aju otoq tqʼama Jehová te. Yajtzun teya, ¿qʼuqli tkʼuʼja tiʼj qa ax ikx kʼonil Jehová tiʼja qa ma nimana te? Bʼaʼn tuʼn tok qeʼ tkʼuʼja tiʼj. Atzun jaʼlo, qo xnaqʼtzal tiʼj juntl xnaqʼtzbʼil aju tzul tyekʼin qe tiʼ bʼaj tej mintiʼ kubʼ jbʼal.