A Zezabɛll wʋma b sẽn maan a Baal no-rɛɛsdbã, t’a sũurã yik wʋsgo. A tʋmame tɩ b tɩ yeel a Eli yaa: ‘Beoogo, b na n kʋʋ foo wa b sẽn kʋ a Baal no-rɛɛsdbã.’ A Eli yɛɛsa wʋsgo, n zoe n kẽng weoogẽ. A pʋʋsa a Zeova n yeel yaa: ‘Zeova, yɛlã yɩɩda maam. Bas-m tɩ m ki.’ A sẽn da yɛ wʋsgã yĩnga, a gũsa tɩɩg tẽngre.

Malɛk n wa n nek-a, n yeel-a yaa: ‘Yik n dɩ.’ A Eli yãa bur sẽn dɩg kug sẽn wɩng zugu, tɩ koom me rɩga. A wãba burã n yũ koomã, la a lebg n gãande. Malɛkã le nek-a lame n yeel yaa: ‘Rɩ n paam pãng tɩ f na n kẽna kẽn-woko.’ A Eli le rɩɩme. Rẽ poore, a kẽna rasem 40 wĩntoog ne yʋngo, n ta Horɛb tãngã. A sẽn ta wã, a kẽe tãngã bokẽ n na n gãande. A Zeova sok-a lame: ‘Eli, bõe la fo maand ka?’ T’a Eli leok yaa: ‘Israyɛll nebã pa tũud foo wa b sẽn pʋlmã ye. B sãama fo tẽn-kugã la b kʋ fo no-rɛɛsdbã. Masã b baooda maam n na n kʋ.’

A Zeova yeel-a lame yaa: ‘Yals tãngã bok noore.’ Pipi, a Eli yãa sob-kẽeng sẽn pɩʋʋge. Rẽ poore, tẽngã rigimdame, tɩ bugum me pɩʋʋge. La a Eli wʋma koɛɛga, wa ned sẽn walemde. A yii tãngã bok noore, n dɩk a fuugã n pil a nengã. A Zeova le sok-a lame tɩ bõe yĩng t’a zoe n wa ka. T’a Eli yeel yaa: ‘M lebga m ye n tũud foo.’ La a Zeova yeelame yaa: ‘Fo pa f yembr ye. Israyɛll neb 7000 n ket n tũud maam. Kẽng n tɩ kɩt t’a Eliize lebg no-rɛɛs n deeg fo zĩiga.’ Zĩig pʋgẽ, a maana a Zeova sẽn yeel-a wã. Fo sã n dat n maan bũmb a Zeova sẽn dat tɩ f maane, fo pa tagsd t’a na n sõnga foo sɩda? A na n sõng-f lame. Masã d ges bũmb sẽn maane, saagã sẽn da wa n pa le niidã.