Béíyal yá dahalneʼii nabiʼdistseed yaa hodiiztsʼą́ąʼgo, Jézebel báhóóchįįd. Iiláíjah haneʼ yichʼįʼ áyiilaago ání: ‘Yiską́ągo Béíyal yá dahalneʼii yę́ęgi átʼéego dadíítsaał.’ Iiláíjah násdzíidgo, honoojíígóó yóóʼeelwod. Sozdoolzingo ájíní: ‘Bikʼee nitsinisdzá, tʼóó dadeestsaał.’ Chʼééh jideeyáago, tʼiis biyaagi ajiiłhaazh.

Diyingo naalʼaʼí hodeelchidgo áháłní: ‘Nídiidáahgo íyą́.’ Iiláíjah jideezghalgo, tsííd bikáaʼgi bááh nímazí dóó tóshjeeh tó bee siʼą́ągo jiiłtsą́. Ajííyą́ą́ʼ dóó tó joodlą́ąʼgo níʼjiiłhaazh. Diyingo naalʼaʼí ánááhodooʼniid: ‘Ííyą́, áko nidziil doo, háálá nízáádgóó díníyá.’ Nááʼjoodą́ą́ʼ bikééʼdóó Dził Hórebgóó joogáałgo dízdiin yiską́. Áadi jiníyáago tséʼáán góneʼ ajiiłhaazh. Ńtʼééʼ Jiihóvah hachʼįʼ haadzíiʼgo áháłní: ‘Iiláíjah, haʼátʼíísh baa naniná?’ Ájíní: ‘Ízrel dineʼé nichʼįʼ ádee hadaasdzííʼ yę́ę doo yikʼehgo ádaatʼée da. Nibikááʼ nááʼiiniihii dayííłchxǫʼ, ná dahalneʼii ałdóʼ nideistseed. Shí éí dashidiyoołhéeł yindahaʼá.’

Jiihóvah áháłní: ‘Nílááh, dziłghą́ąʼgi yiizįįh.’ Ákondi ayóó átʼéego deeyol. Éí bikéédóó niʼ hideesnááʼ, índa kǫʼ hadíínáád. Ńtʼééʼ Iiláíjah iinééʼ joobaʼgo jidiiztsʼą́ą́ʼ. Haniiʼ bikʼíʼjístiʼgo tséʼáán chʼéʼátiingi jiizįʼ. Jiihóvah nahódééłkid: ‘Haʼátʼíísh biniinaa yóóʼíínílwod?’ Áko ájíní: ‘Tʼáá shí tʼéi chʼééyá.’ Ndi Jiihóvah áháłní: ‘Doo tʼáá ni tʼéiyá da. Ízrel dineʼé bitahgi, tsostsʼidi mííl ánéelą́ąʼgo tʼahdii dashidósin. Nílááh, Iiláísha éí nitsáskʼeh góneʼ shá halneʼé ádíílííł.’ Iiláíjah éí Jiihóvah áhodííniid yę́ę biʼjiilaa. Jiihóvah íinízinígíí biʼiinilaago, niísh ałdóʼ níká adoolwołgo átʼe? Aooʼ. Doo nahałtin yę́ędą́ą́ʼ áhóótʼįįdígíí łaʼ baa nídadíitʼįįł.